«Яны павінны пацвердзіць, што не супрацоўнічаюць ні з беларускімі, ні з замежнымі спецслужбамі».
Сяргей Марцалеў, былы кіраўнік выбарчага штаба кандыдата ў прэзідэнты на выбарах 2010 года Мікалая Статкевіча, прапануе апазіцыйным палітыкам прайсці праверку на дэтэктары хлусні, паведаміў ён БелаПАН.
Паводле слоў Марцалева, лідары апазіцыі, фігуранты крымінальных спраў па падзеях 19 снежня 2010 года, «у той ці іншай ступені маюць намер удзельнічаць у парламенцкай выбарчай кампаніі». «Аднак фігурантаў гэтай справы часта падазравалі ў тым, што яны пад націскам пагадзіліся супрацоўнічаць са спецслужбамі.
Алею ў агонь падлілі і факты напісання некаторымі палітыкамі пакаянных лістоў прэзідэнту, і выпадак зэкс-кандыдатам у прэзідэнты Алесем Міхалевічам, які публічна прызнаўся ў тым, што яго выпусцілі ў абмен на абяцанне супрацоўніцтва з КДБ. Зыходзячы з гэтага, палітыкі загаварылі пра „фракцыю генерала Зайцава“ (старшыні КДБ) у апазіцыі», сказаў Марцалеў.
Гэта прывяло да таго, што лідары апазіцыі адзін аднаму не давяраюць, а самі спецслужбы ўсяляк культывуюць чуткі пра вярбоўку, тым самым узмацняючы гэты недавер.
«Таму я прапаную фігурантам крымінальнай справы па падзеях 19 снежня, а таксама лідарам апазіцыі і ключавым фігурам у парламенцкай кампаніі прайсці праверку на дэтэктары хлусні.
Яны павінны пацвердзіць, што не супрацоўнічаюць ні з беларускімі, ні з замежнымі спецслужбамі.З аднаго боку, гэта верне давер сярод лідараў апазіцыі, з іншага — не дасць магчымасці дзяржаўным тэлеканалам казаць, што апазіцыянеры з’яўляюцца „пятай калонай“, „агентамі ўплыву“ і супрацоўнікамі замежных спецслужб», — лічыць Марцалеў.
Ён заявіў, што гатовы першым прайсці такую праверку, а кантраляваць яе прапануе незалежным СМІ.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»41
Каментары