Мэлянхалічны герой рэжа людзей мячом, які вырастае з далоні, – і займаецца каханьнем зь дзяўчынай, імя якой ніяк ня можа запомніць…
Мечаносец (Меченосец).
Расея, 2006, каляровы, 108 хв.
Жанр: Містычна-любоўны трымценьнік.
Адзнака: 2,5 (з 10).
Мэлянхалічны герой рэжа людзей мячом, які вырастае з далоні, – і займаецца каханьнем зь дзяўчынай, імя якой ніяк ня можа запомніць…
Нягледзячы на вялікія грошы, не атрымліваюцца ў расейцаў містыка й фантастыка.
Замест жанравага кіно – глямур і таркоўшчына.
Ад сьвецкіх тусовак і моды – вылізаная карцінка, неверагодна пекныя кадры (апэратар Марат Адэльшын) – дождж, восень, іржавае лісьце. Але кадар пусты.
Ад Таркоўскага – кічавыя пазнакі «духоўнасьці» – вада, нудная задуменнасьць. Але ні героям, ні рэжысэру няма чаго гаварыць. Мутант Саша (Арцём Ткачэнка) нават пнецца на споведзь – але моўны запас карціны настолькі бедны, што й парнафільм на ейным тле падасца шэксьпіраўскай драмай.
Любоўныя сцэны стужкі заслугоўваюць асобнай гутаркі. Прыгожая Чулпан Хаматава нават спрабуе граць. Бяда толькі, што аб’екту для граньня нямашака, – і тут не дапаможа ніякі талент.
Фільм Філіпа Янкоўскага «Ў руху» выклікаў зацікаўленасьць крытыкі, наступны – «Стацкі дарадца» – глядзеўся мёртвым, але прафэсійным; «Мечаносец» – ужо залімітная імітацыя.
Дзе мала глямурных кадраў – выпатрашаныя цельцы: крымінальнікаў, бацькі; распалавінены «бандыт» Аляксей Гарбуноў; гэлікоптэр і пакошаныя дрэвы.
Самае недаравальнае ў стужцы – працягласьць. Але – калі скараціць фільм у 30 разоў – атрымаецца неблагі відэакліп.
У Менску кінасэансы з 16 па 22 кастрычніка ў кінатэатрах «Аўрора», «Берасьце», «Масква», «Кастрычнік», «Салют».
Цяпер чытаюць
Расіянін з судзімасцю заняўся дабрачыннасцю ў Беларусі. У некаторых пасля дапамогі Дзядзі Яшы пачынаюцца праблемы12
Каментары