Расія закрые культурныя цэнтры нямецкага Інстытута Гётэ пасля рашэння Германіі спыніць працу Рускага дома ў Берліне ў адказ на атаку дронаў у Лейпцыгу, заявіў у чацвер міністр замежных спраў Расіі Сяргей Лаўроў.
«Вядома, яны будуць закрытыя пасля таго, як наш культурны цэнтр адтуль выгналі», — заявіў Лаўроў на Усходнім эканамічным форуме ва Уладзівастоку, піша ВВС.
Германія афіцыйна абвінаваціла Расію ў спробе дыверсіі ў сувязі з інцыдэнтам з начыненым выбухоўкай беспілотнікам, які месяц таму выявілі ў аэрапорце Лейпцыга. Кіраўнік МЗС Германіі Ёган Вадэфуль паведаміў, што ў адказ на гэтую спробу дыверсіі Германія закрые расійскае консульства ў Боне і Рускі дом у Берліне.
У аўторак прэзідэнт Расіі Уладзімір Пуцін абвінаваціў Германію ў фальсіфікацыі доказаў з мэтай ускласці адказнасць за інцыдэнт на Маскву.
Паводле Лаўрова, «у немцаў тут ёсць аддзяленні Інстытута Гётэ — і ў Маскве, і ў Піцеры, і ў Екацярынбургу».
«Ну вядома, яны будуць закрытыя пасля таго, як наш культурны цэнтр адтуль выгналі. Інакш мы самі сябе не будзем паважаць», — сказаў міністр.
Паводле звестак самога Інстытута Гётэ, трэцяе аддзяленне ў Расіі знаходзіцца не ў Екацярынбургу, а ў Навасібірску.
Паводле расійскага міністра, нямецкія ўлады «свядома ідуць на крок, які адназначна азначае спыненне іх культурнай прысутнасці ў Расійскай Федэрацыі, якая захоўвалася, нягледзячы на ўсе «ўкраінскія перыпетыі» ў нашых адносінах з Захадам».
Цяпер, дадаў Лаўроў, у іх «не застанецца прамых магчымасцяў працаваць з нашым насельніцтвам».
Першы Інстытут Гётэ ў Расіі адкрыўся ў Маскве ў 1992 годзе, неўзабаве пасля распаду Савецкага Саюза.
Цяпер чытаюць
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай4
Каментары