«Лісты да Джульеты» — ідэальны дамскі кіч для 15-гадовых летуценніц.
ЗША, 2010, каляровы, 105 хв.
Рэжысёр: Гары Ўінік
Ролі выконваюць: Аманда Сэйфрыд, Крыстафэр Іган, Гаэль Гарсіа Бэрналь, Ванэса Рэдгрэйв
Жанр: меладрама, рамантычная камедыя
Адзнака: 4 (з 10)
Заручаная з Віктарам Сафія едзе ў Верону, горад Джульеты. Занудзіўшыся на дзелавых сустрэчах свайго жаніха, Сафія знаёміцца з «сакратаркамі Джульеты», якія адказваюць на любоўныя лісты з усяго свету. На адзін такі згублены ліст, датаваны 1951 годам, адказала й гераіня. Нечакана аўтарка ліста вяртаецца ў Верону, каб знайсці сваё першае каханне. Разам з ёю прыгожы ўнук…
«Лісты да Джульеты» Гары Ўініка — сама пяшчотны дамскі кіч, які толькі можна сабе ўявіць.Тут ёсць усё неабходнае. Сонечная італьянская прырода і рамантычная музыка, гутаркі пра любоў і лісты пра любоў, уздыхі ад расповедаў пра каханне — і лёгкія слёзы.
Ёсць пекны Гаэль Гарсія Бэрналь, які сцішыў свой тэмперамент для дамскага раману — і ёсць Крыстафэр Іган, саладжавая копія Гіта Лэджэра. Ёсць арыстакратычная Ванэса Рэдгрэйв — з вачыма занадта разумнымі для просценькай меладрамы.
Чаго няма ў гэтай мармеладнай стужцы, дзе лепшае змагаецца з найлепшым, а цукернае — з найцукернейшым, дык гэта — канфліктаў.
Але яны й непатрэбныя дамскім эратычным марам. Карціна для 15-гадовых летуценніц, якія рыхтуюцца да жыцця.
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс13
Каментары