У Белавежскай пушчы чэзнуць векавыя дубровы. Навукоўцы патлумачылі, што адбываецца
У Нацыянальным парку «Белавежская пушча» фіксуецца прыкметнае пагаршэнне стану старых дубовых лясоў. Як высветлілі навукоўцы, векавыя дрэвы проста не вытрымліваюць новых кліматычных выклікаў.
Стан перастойных (вельмі старых) лясоў ацанілі супрацоўнікі лабараторыі аптымізацыі і маніторынгу экасістэм Інстытута эксперыментальнай батанікі Нацыянальнай акадэміі навук Беларусі. Як паведамляе тэлеграм-канал установы, даследчыкі правялі маніторынг на сямі пастаянных пунктах назірання ў хваёвых і дубовых фармацыях пушчы — то-бок у буйных лясных масівах, дзе гістарычна дамінуюць менавіта гэтыя пароды дрэў.
Ацэнка бягучага стану экасістэм рабілася на аснове біяіндыкацыйных паказчыкаў. Гэта такі метад даследавання, пры якім здароўе навакольнага асяроддзя вызначаюць не праз складаныя хімічныя аналізы глебы ці паветра, а па знешнім выглядзе, тэмпе росту і агульным самаадчуванні саміх жывых арганізмаў — у гэтым выпадку дрэў.
Вынікі даследавання паказалі, што дубовыя насаджэнні знаходзяцца ў аслабленым стане. Пры гэтым спецыялісты адзначаюць цікавую дэталь: стан дуба чарэшчатага (або звычайнага) ацэньваецца значна горш, чым стан больш рэдкага дуба скальнага і іншых спадарожных парод лесу, такіх як граб, клён, ліпа, асіна і елка.
Навукоўцы называюць адразу некалькі прычын такога становішча. У першую чаргу на дрэвы ўплывае натуральнае старэнне і наступствы засушлівых перыядаў апошніх гадоў, якія моцна б'юць па вільгацелюбівых экасістэмах.
Негатыўны ўплыў аказвае і адсутнасць санітарных мерапрыемстваў у запаведных зонах.
Сярод галоўных пагроз для пушчанскіх дуброваў даследчыкі вылучаюць развіццё фітапатагенаў — небяспечных для дрэў хваробатворных грыбкоў і бактэрый. Акрамя таго, лес пакутуе ад насякомых-шкоднікаў і аб'ядання дзікімі жывёламі, што ў навуковай тэрміналогіі называецца заагенным фактарам.
-
Сталі вядомыя падрабязнасці вясновай трагедыі ў Полацкім манастыры, калі жанчына загінула пры пажары. Усяму віной п'янства
-
У Гродне п'яны мужчына пайшоў на прыпынак і пужаў хлопчыка пнеўматычным пісталетам
-
Адвакат Аляксандр Данілевіч: Мяне адвялі ў клетку на КПП і зачыталі ўказ для службовага карыстання пра памілаванне па просьбе Міжнароднага алімпійскага камітэта
Каментары
Колькі дзесяцігоддзяў пройдзе, каб вырасціць некалькі пакаленняў дарослых дрэў?
Тым больш, размова зараз не пра "каб нешта расло" - можна знайсці і больш паўднёвыя культуры, а каб захаваць натуральныя (першабытныя) лясы.