Памерла Бернадэт Шырак — удава былога прэзідэнта Францыі Жака Шырака. Пра гэта паведаміла яе дачка Клод Шырак. Бернадэт Шырак пайшла з жыцця ва ўзросце 93 гадоў. Паводле слоў дачкі, яна памерла спакойна ў коле сваіх блізкіх.
Бернадэт Шырак займала асаблівае месца ў французскай палітыцы. Яна стала адзінай першай лэдзі ў гісторыі Францыі, якая сама займала выбарныя дзяржаўныя пасады. У 1971 годзе яе абралі ў муніцыпальную раду камуны Саран, а з 1979 да 2015 года яна была генеральным дарадцам дэпартамента Карэз.
Жак Шырак узначальваў Францыю два прэзідэнцкія тэрміны запар — з 1995 да 2007 года. Ён памёр у верасні 2019 года ва ўзросце 86 гадоў.
Бернадэт і Жак Шыракі былі адной з самых вядомых палітычных пар Францыі і заставаліся разам на працягу многіх дзесяцігоддзяў.
Каментары