У Варшаве назвалі імя лаўрэата паэтычнай прэміі імя Наталлі Арсенневай 2026 года. Ім стаў Ігар Кулікоў з кнігай вершаў і перакладаў з санскрыту і англійскай «Нетутэйшая далечыня», якая выйшла ў выдавецтве «Янушкевіч» у 2025 годзе, паведаміў Беларускі ПЭН.
Узнагароду Ігар Кулікоў атрымаў «за метафізічную адвагу ў працы з мовай і стварэнні апрычонага мастацкага свету». Журы адзначыла працу аўтара ў стварэнні свайго моўнага экзістэнцыйна-паэтычнага космасу.
Сёлета ў кароткім спісе намінантаў прэміі былі тры кнігі. Апрача кнігі-пераможцы, яго складалі зборнікі «Хроніка адмаўлення пустаты» Іллі Кульбіцкага (выдавецтва Skaryna Press, 2025) і «Чайны збор. Выбраная постпаэзія 2007—2025» Макса Шчура (выдавецтва SayBeat, 2025).
Прэмія імя Наталлі Арсенневай — літаратурная ўзнагарода, якая прысуджаецца за найлепшую беларускую паэтычную кнігу. Яна была заснаваная ў 2016 годзе Беларускім ПЭН-цэнтрам, Саюзам беларускіх пісьменнікаў і Згуртаваннем беларусаў свету «Бацькаўшчына». З 2021 года арганізацыяй гэтай падзеі займаюцца Беларускі ПЭН і Міжнародны саюз беларускіх пісьменнікаў.
Пераможцы прэміі імя Натальлі Арсенневай мінулых гадоў:
- 2017 — Уладзімер Някляеў, «Толькі вершы»;
- 2018 — Алесь Разанаў, «Перавыбранае»;
- 2019 — Марыя Мартысевіч, «Сарматыя»;
- 2020 — Андрэй Хадановіч, «Школа травы»;
- 2021 — Алеся Башарымава, «Расамаха»;
- 2022 — Дар’я Бялькевіч, «Сьлёзы на вецер»;
- 2023 — Наста Кудасава, «Побач»;
- 2024 — Ганна Шакель, «Цела мігдалу»;
- 2025 — Сяргей Прылуцкі, «Нічога нястрашнага».
Каментары