ЗША абмяжуюць паслабленне нафтавых санкцый супраць Расіі пастаўкамі ў Індыю
Злучаныя Штаты Амерыкі паведамілі партнёрам з «Вялікай сямёркі», што магчымыя паслабленні санкцый супраць расійскай нафты будуць вельмі абмежаванымі і ў асноўным закрануць пастаўкі ў Індыю. Пра гэта паведаміў еўракамісар па эканоміцы Валдзіс Дамброўскіс пасля тэлефоннай размовы міністраў фінансаў краін G7, піша Bloomberg.
Са слоў еўракамісара, амерыканскі бок падкрэсліў, што такое паслабленне будзе абмежавана і часам, і аб’ёмамі. У Вашынгтоне таксама лічаць, што гэты крок не акажа істотнага ўплыву на агульныя нафтавыя даходы Расіі.
Раней прэзідэнт ЗША Дональд Трамп заявіў, што абмяркоўваў з расійскім прэзідэнтам Уладзімірам Пуціным магчымасць частковай адмены некаторых нафтавых санкцый. Мэта — дапамагчы знізіць цэны паліва. Падрабязнасці гэтай размовы не былі раскрытыя.
ЗША ўжо дазволілі Індыі закупляць расійскую нафту, якая на момант прыняцця рашэння знаходзілася ў моры. Паводле крыніц, калі будуць новыя паслабленні, яны будуць праводзіцца па падобнай схеме, але канчатковае рашэнне будзе прымаць сам Трамп.
Нафта на сусветным рынку ў панядзелак падаражэла амаль да 120 даляраў за бараль. Гэта адбылося на фоне скарачэння здабычы нафты на Блізкім Усходзе і праблем з транспартаваннем праз Армузскі праліў, дзе ўзнікла небяспечная сітуацыя для танкераў. Пасля, праўда, яна адкацілася да 90 даляраў пасля таго, як Дональд Трамп заявіў, што аперацыя ў Іране блізкая да заканчэння.
Краіны «Вялікай сямёркі» таксама заявілі, што гатовыя выкарыстоўваць свае стратэгічныя запасы нафты, калі сітуацыя на рынку стане яшчэ больш складанай. Аднак частка ўдзельнікаў лічыць, што пакуль для гэтага няма дастатковых падстаў.
Чакаецца, што пазней на гэтым тыдні лідары краін G7 правядуць яшчэ адну размову, каб абмеркаваць сітуацыю вакол Ірана і яе ўплыў на сусветны энергетычны рынак.
Цана Brent адкацілася да $90 за бараль на фоне абяцанняў Трампа хутка скончыць вайну супраць Ірана
Падчас бамбардзіровак Ірана амерыканцы не кранаюць маленькі востраў — галоўную нафтавую артэрыю. Чаму?
Калі вайна ў Іране найбліжэйшым часам не скончыцца, свет можа ўступіць у наймацнейшы энергакрызіс з 1970‑х гадоў
Цяпер чытаюць
«Больш за 10 чалавек выехалі ў Еўропу — і гэта толькі з майго аддзялення». Рэаніматолаг з райцэнтра шчыра апісаў будні беларускай медыцыны14
Каментары