У Мінсувязі патлумачылі, чаму так і не адмянілі роўмінг з Расіяй
Чаму працэс адмены роўмінгу з Расіяй зацягнуўся на гады і чаму яго поўнай адмены так і не адбылося, распавёў на СТБ першы намеснік міністра сувязі Павел Ткач.
Пра адмену роўмінгу гаворыцца так доўга, што нават прапагандыстка Алёна Сырова на СТБ спытала: «Мы вельмі доўга працавалі над тым жа роўмінгам. Павел Мікалаевіч, на сённяшні дзень як ідуць справы? Чаму так доўга мы да гэтага пытання падступаліся, каб хаця б яго пачаць вырашаць?»
Павел Ткач, першы намеснік міністра сувязі і інфарматызацыі Беларусі не даў надзеі, што роўмінг канчаткова знікне, нягледзячы на ўсе папярэднія абяцанні.
Ён адказаў — праблема тэхнічная, хаця патлумачыў фінансавымі чыннікамі.
«Чаму не зрабілі поўную адмену, часта задаюць пытанне. У першую чаргу, пытанне тэхнічнае. Калі мы ў роўмінгу, у нас заўсёды працуе як мінімум тры аператары. Гэта аператар хатняй сеткі, аператар гасцявой сеткі і транзітны аператар. І, адпаведна, выдаткі крыху вышэйшыя, чым калі вы размаўляеце ў сваёй уласнай сетцы. Таму, так, мы абмежавалі пэўны прыбытак для аператараў, але тым не менш мы змаглі ўстанавіць, што тое рашэнне, якое было прынята, яно было прынята абсалютна ўзважана і правільна», — сказаў ён.
Паводле слоў чыноўніка, новыя правілы, якія дзейнічаюць з сакавіка 2025 года, маюць свае ліміты. Згодна з новымі нормамі, беларусы ў Расіі (і наадварот) атрымліваюць «150 хвілін уваходных бясплатна на месяц, 150 зыходных за кошт хвілін, уключаных у тарыфны пакет, і да 5 гігабайт інтэрнэт-трафіку па тарыфах, параўнальных з тарыфамі ў хатняй сетцы».
Тлумачачы шматгадовую затрымку з вырашэннем пытання, чыноўнік спаслаўся на тэхнічныя складанасці і барацьбу з «нядобрымі людзьмі».
«Чаму так доўга? Таму што неабходна было вырашаць шэраг пытанняў тэхнічнага, прававога характару, у тым ліку пытанні барацьбы з фродам. То-бок калі мы разумеем, што ў нас ёсць танныя размовы па сетках сотавай сувязі, могуць з'явіцца нядобрыя людзі, ашуканцы, якія будуць выкарыстоўваць гэтыя сеткі для перакідання дарагога камерцыйнага трафіку. Нам трэба было выразна зразумець, што той трафік, які прагаворваюць людзі па сетках сотавай сувязі, гэта і ёсць ільготны роўмінгавы трафік», — сказаў ён.
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары