У Мадрыдзе закрылі кітайскі рэстаран, у якім пад выглядам качак людзей кармілі галубамі
Падчас праверкі кітайскага рэстарана ў іспанскім Мадрыдзе паліцыя знайшла сур’ёзныя парушэнні санітарных нормаў, што маглі пагражаць здароўю кліентаў. Аказалася, наведвальнікам там падавалі стравы з мяса вулічных галубоў, выдаючы яго за качынае, піша выданне The Sun.
У памяшканнях знайшлі ёмістасці з мясам невядомага паходжання, а таксама вялікія міскі з абскубанымі вулічнымі галубамі — усяго каля 300 кілаграмаў. Уся гэтая прадукцыя захоўвалася без належных умоў.
Акрамя таго, у зонах прыгатавання ежы бегалі прусакі, на падлозе ляжалі пасткі для пацукоў, а сярод запасаў паліцыя знайшла і мяса жывёл, якія адносяцца да відаў пад аховай.
Праверка рэстарана «Джын Гу» ў Мадрыдзе прайшла яшчэ ў сакавіку 2025 года. Пасля знойдзеных парушэнняў установу закрылі, што было афіцыйна пацверджана ў студзені 2026-га. У дачыненні да ўладальніка рэстарацыі распачалі крымінальную справу за парушэнне грамадскага парадку і правіл бяспекі харчовых прадуктаў.
Каментары