«У мяне застаўся голас, але я нечакана забыла словы»: Ларыса Грыбалёва распавяла пра свой міні-інсульт
Артыстка была дома з дзецьмі, замаўляла па тэлефоне сушы. Але ў апошні момант не змагла адказаць на простае пытанне аператара — аплата будзе карткай ці наяўнымі. Неабходныя словы вылецелі з галавы.
Нагадаем, нядаўна знакамітая артыстка і бізнэсвумен Ларыса Грыбалёва апублікавала ў інстаграме фотаздымкі з бальніцы. У яе здарылася транзіторная ішэмічная атака. Гэта часовае парушэнне кровазвароту ў мозгу — яго яшчэ называюць міні-інсультам.
Цяпер жа спявачка вырашыла падзяліцца падрабязнасцямі, але шчыра прызнаецца, што не вельмі разумее, з якога моманту пачынаць расповед. Кажа, гэта быў вельмі добры дзень, які плаўна перацёк у цудоўны вечар. Ніякіх праблем са здароўем Ларыса не адчувала. Яна не хвалявалася, не была ў стрэсе.
— Мы з дзецьмі замаўлялі сушы, выбралі хто што хоча. Я зрабіла замову, размаўляла з аператарам. Апошняе, што мне трэба было зрабіць — распавесці, як я буду аплачваць — карткай ці наяўнымі.
І вось у гэты момант адбылося нечаканае: Ларыса, якая хвіліну таму спакойна абмяркоўвала замову, раптам не змагла адказаць на стандартнае пытанне. Яна забылася простыя словы, якія былі патрэбныя ў гэтай сітуацыі.
— Я дакладна разумела думку, але ў мяне не было слоў. Гэта так жудасна: калі ты ўсё разумееш, але не можаш пра гэта сказаць. Голас у мяне быў. Я змагла сказаць толькі, што ператэлефаную. Я не змагла сказаць дачцэ, што мне вельмі дрэнна. Я села на стул і паклала галаву на стол.
Дачка Ларысы спужалася. Пачала перапытваць, ці гэта ціск, дзе ў доме шукаць танометр. А маці не магла ёй растлумачыць, што танометр ляжыць на тумбачцы — хоць добра разумела, што менавіта хоча сказаць. Праблема была ў тым, што словы быццам бы зніклі з памяці.
Дачка выклікала хуткую дапамогу, медыкі прыехалі аператыўна.
— Калі прыехала хуткая, я яшчэ дрэнна размаўляла, але некаторыя словы ўжо пачалі ўсплываць у галаве. Калі мне зрабілі ўколы, памералі цукар, ціск… Я лічу, для таго стану ціск у мяне быў ідэальны — 126 на 86. Калі мне прапанавалі паехаць у бальніцу, я яшчэ думала, ці варта — здаецца ж, я пачала прыходзіць у сябе.
Але артыстка раіць усім у такіх выпадках ехаць у бальніцу і не думаць, што ўсё добра. Ларысу асабіста матывавала здацца медыкам гісторыя, якая здарылася з яе маці гадоў 6 таму.
— Яна была вельмі актыўная, магла, мабыць, танчыць ды праз плот скакаць. Але нечакана ўсплыла, што яна не помніць гадоў пяць са свайго жыцця. Мы паехалі ў бальніцу, і высветлілася, што ў мамы адбыўся сапраўдны інсульт.
Ларыса кажа, што ёй пашанцавала больш — бо ў яе выпадку МРТ ніякіх наступстваў не зафіксавала. Але раіць усім, у каго пачаліся праблемы з памяццю і гаворкай, тэрмінова звяртацца да дактароў.
Сама ж спявачка ўжо чакае, калі яе выпішуць з бальніцы — і спадзяецца, што гэта адбудзецца хутка.
«Дык дадому забяры алкаша абасцанага і выходжвай». Малады загадчык аддзялення бальніцы не стрымлівае сябе ў выразах у сацсетках
«Калі б не выклікалі хуткую, жыць мне заставалася некалькі гадзін». У 38‑гадовай беларускі здарыўся інфаркт
Чаму жанчыны часцей пакутуюць на мігрэнь, а мужчыны — на інфаркты?
Каментары