Па інфармацыі выдання The Wall Street Journal, пасланнік Трампа Джон Коўл прапанаваў Лукашэнку сродак для пахудзення пад назвай Zepbound. Расказваем, што гэта за прэпарат.
Прэпарат Zepbound адносіцца да найноўшага пакалення рэцэптурных сродкаў для доўгатэрміновага кантролю вагі. Яго вытворца — буйная амерыканская фармацэўтычная карпарацыя Eli Lilly. Шырокая аўдыторыя больш чула пра «Аземпік», але Zepbound часта ўспрымаецца як больш сучасны і ў многіх выпадках больш эфектыўны сродак для пахудзення, паколькі ў даследаваннях ён дэманстраваў вельмі значныя вынікі па зніжэнні масы цела.
Асноўнае дзеючае рэчыва Zepbound — тырзепатыд (tirzepatide). Адметнасць гэтага рэчыва ў тым, што яно ўздзейнічае адразу на два тыпы рэцэптараў, звязаных з рэгуляцыяй апетыту і абмену рэчываў: глюкагонападобнага пептыду-1 (GLP-1) і глюкозазалежнага інсулінатропнага поліпептыду (GIP).
Такая падвойная схема дзеяння дапамагае зніжаць пачуццё голаду, узмацняць адчуванне насычэння, запавольваць апаражненне страўніка і ў выніку памяншаць колькасць калорый, якія чалавек спажывае. Адначасова прэпарат можа паляпшаць паказчыкі, звязаныя з кантролем цукру ў крыві, — гэта адна з прычын, чаму такія лекі пачыналі як сродкі для людзей з дыябетам, але хутка сталі ключавымі і ў тэме барацьбы з атлусценнем.
Як ужываць
Прэпарат выпускаецца ў форме аднаразовых ін’екцыйных ручак (аўтаін’ектараў) для падскурнага ўвядзення. Ін’екцыю пацыент робіць самастойна адзін раз на тыдзень — у раёне жывата, сцягна або верхняй часткі рукі.
Лячэнне заўсёды пачынаецца з мінімальнай дозы 2,5 міліграма, каб арганізм мог адаптавацца і каб знізіць верагоднасць непрыемных пабочных эфектаў, найперш звязаных са страваваннем. Далей доза павялічваецца паступова — звычайна з інтэрваламі не менш за чатыры тыдні — пакуль не дасягне падтрымліваючага ўзроўню. Ён можа вагацца ў залежнасці ад пераноснасці і эфекту, але максімальная доза складае 15 міліграмаў на тыдзень.
Важна разумець, што Zepbound не з’яўляецца кароткатэрміновым сродкам. Ён прызначаны для хранічнага кантролю вагі, і на практыцы лячэнне можа цягнуцца месяцы і гады. Даследаванні і назіранні паказваюць, што пасля спынення такіх ін’екцый вага часта можа вяртацца, таму працягласць тэрапіі вызначаецца індывідуальна і ў значнай ступені залежыць ад таго, наколькі чалавек здольны ўтрымліваць вынік без фармакалагічнай падтрымкі. Даступнасць гэтага сродку абмежаваная не толькі рэцэптурным статусам, але і высокім коштам.
У Злучаных Штатах афіцыйны арыенціровачны кошт месячнага курса можа перавышаць тысячу даляраў.
Пабочныя эфекты
Аднак за высокай эфектыўнасцю хаваюцца і рызыкі. Інструкцыя Zepbound папярэджвае пра шырокі спектр пабочных эфектаў. Клінічныя выпрабаванні паказалі, што пераважная большасць пацыентаў сутыкаецца з рэакцыяй страўнікава-кішачнага тракту.
Самай частай скаргай з’яўляецца млоснасць, якую адчуваюць ад 25% да 29% пацыентаў у залежнасці ад дазіроўкі (супраць 8% у групе плацэба). Таксама часта ў пацыентаў назіраюцца дыярэя (19—23%) і рвота (8—13%).
Акрамя гэтага, некаторыя сутыкаюцца з праблемамі ў працы кішачніка, такімі як запоры (11—17%) і павышанае газаўтварэнне, ці метэарызм (3—4%). Пацыенты могуць адчуваць рэзі і болі ў жываце (9—10%), агульнае парушэнне стрававання ці дыспэпсію (9—10%), а таксама пакутаваць ад пастаяннай адрыжкі (4—5%). У некаторых выпадках назіраецца ўздуцце жывата (3—4%).
Акрамя стрававальнай сістэмы, Zepbound можа ўплываць на агульны стан і знешнасць. Так, ад 5% да 7% удзельнікаў даследаванняў паведамлялі пра моцную стомленасць, а ў 4—5% выпадкаў было зафіксавана выпадзенне валасоў. Таксама магчымыя рэакцыі ў месцы ўколу, такія як пачырваненне ці сверб (6—8%), галавакружэнне (4—5%) і невялікае зніжэнне артэрыяльнага ціску (1—2%).
Супрацьпаказанні
Больш небяспечныя ўскладненні ўключаюць рызыку панкрэатыту і праблемы з жоўцевым пузыром — асабліва на фоне хуткага пахудзення. Акрамя таго, існуюць сур’ёзныя перасцярогі адносна шчытападобнай залозы: у даследаваннях на жывёлах было зафіксавана павелічэнне рызыкі пухлін С-клетак шчытападобнай залозы.
Таму прэпарат супрацьпаказаны людзям, у якіх у асабістай або сямейнай гісторыі быў медулярны рак шчытападобнай залозы, а таксама тым, хто мае сіндром множных эндакрынных неаплазій 2 тыпу (MEN-2). Гэта адзін з ключавых пунктаў бяспекі, які патрабуе ад пацыентаў і лекараў асаблівай уважлівасці.
Такім чынам, прэпарат, які ў публічнай гісторыі стаў своеасаблівым «мостам» у нефармальнай камунікацыі паміж Коўлам і Лукашэнкам, у рэальнасці з’яўляецца сур’ёзным медыцынскім сродкам. Ён можа даваць значны эфект у зніжэнні вагі, але патрабуе не толькі вялікіх грошай, але і адказнага выкарыстання пад наглядам спецыялістаў.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары