Сёстры Груздзевы драматычна расказалі, як іх выкінуў за дзверы міністр культуры Руслан Чарнецкі. «Як сабак»
Міністр, па словах артыстак-лукашыстак, указаў ім на дзверы і абурана мыкаў.
Спявачкі сёстры Груздзевы паскардзіліся на тое, што не змаглі знайсці агульную мову з новым міністрам культуры Русланам Чарнецкім. І апісалі тое, што адбылося амаль год таму ў міністэрскай прыёмнай.
Папярэднік Чарнецкага ў міністэрскім крэсле Анатоль Маркевіч (падчас працы старшынёй Навагрудскага райвыканкама ён запомніўся тым, што арганізаваў малебен з просьбай аб дажджы) Груздзевых, падобна, любіў. Яны самі часта публікавалі здымкі з ім. І цяпер хваляцца, што Маркевіч з энтузіязмам вырашаў іх пытанні.
Сапраўды, тады быў іх зорны час — сясцёр запрашалі выступаць усюды. Аплачвалася гэта шчодра — артысткі маглі сабе дазволіць паліто «любімага брэнда Пуціна» за 3500 рублёў.
Але ўсё змянілася ў снежні 2024 года, калі Лукашэнка прызначыў міністрам культуры акцёра Руслана Чарнецкага. Выглядае, Маркевіч не пакінуў яму ў спадчыну любоў да Груздзевых.
Валянціна і Аляксандра засталіся па-за кадрам.
У сваім відэа абураныя сёстры распавядаюць, што некалькі месяцаў спрабавалі трапіць на прыём да высокага чыноўніка — каб пазнаёміцца і абмеркаваць свае пытанні. Яны не называлі імя таго чалавека, але, як даведалася «Наша Ніва» ад людзей з беларускага шоу-бізнэсу, гаворка ідзе менавіта пра Чарнецкага.
Афіцыйна запісацца на прыём у іх не атрымлівалася. Сакратарка раз за разам паўтарала, што няма такой магчымасці. Нават калі сёстры тэлефанавалі зранку ў панядзелак, калі пачынаўся запіс на асабістыя прыёмы, то чулі, што, на жаль, усе магчымыя варыянты часу ўжо распісаныя.
Груздзевы пісалі лісты — але і так дыялогу не атрымоўвалася. Тады сёстры вырашылі ісці ва-банк і летась 17 сакавіка проста прыехалі ў прыёмную міністра.
— Сакратарка ні ў якую: «Дзяўчаты, вам не трэба, вам адказалі». Я кажу: «Ну як нам адказалі, калі пытанні не вырашаюцца?!» — «Калі вам нешта не падабаецца, дык ідзіце ў суд».
Груздзевы ўжо сабраліся сыходзіць і нават выйшлі ў калідор, як раптам у прыёмнай з’явіўся выканаўца галоўнай ролі ў гэтай трагікамедыі.
Аляксандра ўзрадавалася і сказала сястры, што можна цяпер падысці і асабіста распавесці пра свае праблемы. Узброіўшыся абразом Святога Мікалая, Груздзева рынулася на амбразуру.
— Кажу: «Ведаеце, цягам трох месяцаў мы не можам да вас запісацца на прыём. Ваша сакратарка нас не пускае».
Чарнецкі пацікавіўся, па якіх пытаннях яго хочуць патурбаваць — артыстка распавяла. Адно з пытанняў, як адзначае Аляксандра, было для іх асабліва важным. На яго міністр адрэагаваў нервова: «Не прыдумляйце канспіралагічных тэорый!»
Груздзева ажно разгубілася. А пасля стала расказваць Чарнецкаму пра 2020 год і прасіцца на прыём.
Далей, па словах Аляксандры, была тэатральная паўза:
— Ён глядзіць на мяне страшнымі вачамі, у яго твар мяняецца…
А далей, па словах жанчыны, міністр культуры ўскінуў руку, паказваючы на дзверы двума пальцамі, і пры гэтым гучна мыкаў.
У такой сітуацыі разгубілася нават Груздзева.
— Я пытаюся: «Што?». А ён мычыць і пальцамі паказвае на дзверы. І вось у гэтай цішы, я не разумею, што адбываецца, а ў мяне ў руках ікона… Я гляджу ў вочы гэтаму чыноўніку, ён глядзіць мне — можа, секунд 30 прайшло, можа хвіліна. Я мысленна прашу: «Божа! Святы Мікалай! Дапамажы мне стрымацца і не разраўсціся, дапамажы мне проста сабрацца з сіламі і нешта ўцямнае яму сказаць». Сілы былі ўвогуле на зыходзе. Ведаеце, як быццам цябе абухом па галаве стукнулі, ты не разумееш… Я дзякуючы гэтаму абразу Святога Мікалая кажу: «Добра. Значыць наступным разам. Значыць пазней».
У калідоры Аляксандра расплакалася. Прызнаецца, што было адчуванне, быццам яе як сабаку выкінулі за дзверы. Відавочна, што сёстры чакалі прызнання за сваю працу ў 2020 годзе. Усур’ёз яны разважаюць, як супрацьстаялі Захаду, які ладзіў сваю барацьбу з дапамогай метадычкі Шарпа.
— Ці думала я ў 2020 годзе, калі мы ехалі да стэлы і нам крычалі: «Ганьба!», потым гэтыя тысячы каментароў у сацсетках… Пудзілы ставілі каля нашага дома… Калі іншыя паціскалі рукі і казалі, што мы сталі маральным арыенцірам… Калі вядучыя «Скажи не молчи» казалі, што весь шоу-бізнэс хаваўся за нашымі спінамі… Ці думала я, што ў 2025 годзе ў кабінеце ў чыноўніка ён мне пакажа як сабаку на дзверы? Нават не пагаварыўшы, нават не пацікавіўшыся…
Свой стан у той момант Аляксандра Груздзева называе маленькай смерцю.
Сёстры цяжка перажываюць тую сустрэчу і сёння. У чэрвені паспрабавалі напісаць ліст Чарнецкаму, у якім распавялі пра тое, што адчуваюць. Але ж наладзіць адносіны гэта не дапамагло.
Спевака з «Марафону адзінства» асудзілі за палітыку — прыгадалі каментары 2020-га. Бараніць у суд яго хадзілі сёстры Груздзевы
Былы міністр культуры Маркевіч знайшоў сабе працу мары лукашыстаў
Сёстрам Груздзевым не дазволілі выступіць на галоўным форуме ў Дзень адзінства, а падпісчыкі западозрылі іх у здрадзе
Новы міністр культуры выпусціў кліп — плюецца ў выдуманых ворагаў
Цяпер чытаюць
Той самы масажыст расказаў, навошта здымаў голых кліентак22
Каментары