Беларусам можна не плаціць па крэдытах, якія аформілі махляры. Вось у якіх выпадках
Што рабіць беларусу, калі на ягонае імя махляры дыстанцыйна аформілі крэдыт, а банк патрабуе вяртання?
Крымінальныя расследаванні спраў аб махлярстве ў лічбавым асяроддзі, у прыватнасці, звязаных з афармленнем анлайн-крэдытаў на пацярпелага і выкраданнем у далейшым гэтых грошай, часта зацягваюцца. Таму першы намеснік пракурора Мінска Казімір Кежун раіць пацярпелым наўпрост звяртацца ў суд з іскам аб аспрэчванні крэдытных дагавораў у парадку грамадзянскага судаводства.
Падстава для іску — адсутнасць волі крэдытаатрымальніка на заключэнне дагавора і махлярскія дзеянні трэціх асоб, якія завалодалі персанальнымі данымі беларусаў (паролямі, пашпартнымі данымі, рэквізітамі карт, СМС-кодамі), піша «МП».
Для разгляду справы аб аспрэчванні крэдытнага дагавора суды запытваюць матэрыялы крымінальных спраў і, у залежнасці ад абставін, ацэньваюць, ці быў у беларуса намер браць крэдыт.
Ёсць некалькі рэальных кейсаў, калі дагавор, які заключылі махляры, прызналі несапраўдным. 62‑гадовы інвалід, які не карыстаўся інтэрнэт-банкінгам, паведаміў махлярам праверачны код з СМС. Суд даведаўся, што за гадзіну аферысты стварылі ад імя ахвяры ўліковы запіс і аформілі крэдыт. Дагавор прызналі незаключаным, бо воля мужчыны на здзелку адсутнічала.
Вось яшчэ адзін кейс. Пажылой жанчыне аформілі анлайн-крэдыты на суму больш за 9500 рублёў пасля таго, як ілжэсупрацоўнік праваахоўных органаў атрымаў аддалены доступ да яе смартфона. Праз індывідуальныя асаблівасці яна не магла самастойна ў поўнай меры абараніць свае правы, у сувязі з чым пракурор у яе інтарэсах у адзін з раённых судоў сталіцы накіраваў іскавую заяву аб прызнанні крэдытных дагавораў незаключанымі. Суд задаволіў патрабаванні пракурора, бо даказаў, што дагаворы ад імя ахвяры і без яе ўдзелу заключаў пабочны чалавек з-за мяжы.
«Дагавор, які суд прызнаў незаключаным, не спараджае юрыдычных наступстваў. Адпаведна, банк не мае права патрабаваць ад грамадзяніна, на чыё імя аформлены крэдыт, вяртання грашовых сродкаў», — тлумачыць Казімір Кежун.
Суд адмовіць, калі вызначыць, што вы былі даўнім удзельнікам сістэмы анлайн-банкінгу, самі прымалі актыўны ўдзел у заключэнні крэдытнага дагавора, але па неасцярожнасці перадалі персанальную інфармацыю махлярам. У такім выпадку дагавор будзе лічыцца заключаным.
Цяпер чытаюць
Папулярную тыктокерку з Лунінца, якая ратавала бяздомных жывёлінаў, асудзілі за палітыку2
Каментары