У Літве правялі спецаперацыю па пошуку і затрыманні людзей, звязаных з кантрабандай
17 лістапада ў Літве правялі буйную спецаперацыю, якую каардынавала Служба аховы дзяржаўнай мяжы. Яе заяўленая мэта — спыніць кантрабанду, што перакідаецца з Беларусі ў Літву паветранымі шарамі, і знайсці людзей, якія гэтым займаюцца.
У аперацыі, як паведамляецца, удзельнічалі больш за 100 супрацоўнікаў розных сілавых структур. Яны правялі больш за 30 ператрусаў у Вільні, Друскеніках, а таксама ў Аранскім і Салечніцкім раёнах, зрабіўшы шэраг іншых следчых дзеянняў.
Міністр унутраных спраў Літвы Уладзіслаў Кандратовіч адзначыў, што ўзмацненне крымінальнай разведкі і цеснае супрацоўніцтва паміж службамі дае добрыя вынікі і пасылае выразны сігнал арганізатарам кантрабанды.
Падчас аперацыі знайшлі дзясяткі GPS-прылад, якія выкарыстоўвалі для кіравання кантрабанднымі паветранымі шарамі, сродкі сувязі, мабільныя тэлефоны. Таксама былі знойдзеныя агнястрэльная зброя і патроны, наркотыкі, кантрабандныя цыгарэты, аўтамабілі і іншыя сродкі, што выкарыстоўваліся ў злачыннай дзейнасці.
Літоўскія сілавікі затрымалі як кантрабанду, перакінутую з Беларусі паветраным шляхам, так і падазраваных асоб. Паводле прагнозаў, кола падазраваных можа пашырыцца, бо аперацыя яшчэ працягваецца.
Паводле даных на гэты момант, ужо вызначылі больш за сто чалавек, звязаных з перакіданнем цыгарэт паветраным шляхам. Сёлета каля 80% нелегальных цыгарэт, што трапілі ў Літву з Беларусі, былі дастаўленыя менавіта так — з дапамогай паветраных шароў або дронаў. Усяго было затрымана больш за 1,3 мільёна пачкаў цыгарэт.
Міністэрства ўнутраных спраў Літвы ініцыявала змены ў заканадаўстве, каб узмацніць адказнасць за такую дзейнасць.
У Літве затрымалі яшчэ трох чалавек, звязаных з кантрабандай з дапамогай паветраных шароў з Беларусі
У Вільні перавозчыкі зладзілі ціхую акцыю ў сувязі з блакаваннем літоўскіх фур у Беларусі
Літоўскія памежнікі зладзілі пагоню за кантрабандыстамі, дагналі ў чыстым полі
У Літве затрымалі трох чалавек, якія падазраюць у спрыянні кантрабандзе з Беларусі
Каментары
> "дзясяткі GPS-прылад, якія выкарыстоўвалі для кіравання кантрабанднымі паветранымі шарамі"
Імі кіраваць немагчыма. Размова, хутчэй за ўсё, пра маячкі, якія праз GPRS перадаюць свае GPS-каардынаты.