Трамп зноў заявіў, што Украіна можа выйграць у вайне. Але не думае, што выйграе
Прэзідэнт ЗША Дональд Трамп зноў заявіў, што, на яго думку, Украіна ўсё яшчэ мае шанец перамагчы ў вайне з Расіяй, хоць сам ён лічыць такі вынік малаверагодным. Паводле яго слоў, вайна — «вельмі дзіўная рэч», і таму нельга выключаць ніякіх сцэнарыяў, піша The Moscow Times.
«Яны ўсё яшчэ могуць выйграць. Я сказаў, што яны могуць выйграць усё, што заўгодна. Вайна — вельмі дзіўная рэч. Не думаю, што яны гэта зробяць, але яны могуць. Я ніколі не казаў, што яны выйграюць. Я сказаў, што яны могуць выйграць», — заявіў амерыканскі прэзідэнт у размове з журналістамі.
Трамп адзначыў, што найлепшым варыянтам было б мірнае ўрэгуляванне канфлікту, бо ў іншым выпадку «вельмі многія людзі заплоцяць вялікую цану». Калі журналісты спыталі, чаму ЗША проста не дамагаюцца перамогі Украіны, ён адказаў рэзка, заявіўшы, што яны «не разумеюць, пра што гавораць».
Таксама Трамп расказаў, што падчас апошняй размовы з Уладзімірам Пуціным заклікаў яго спыніць напады на мірныя аб’екты ва Украіне, але не стаў раскрываць, што адказаў Пуцін. На пытанне пра ўдары Расіі па цывільных раёнах Трамп сказаў, што «так, гэта абмяркоўвалася», але, паводле яго слоў, «большасць загінулых — гэта вайскоўцы».
Раней, 23 верасня, у сваёй сацыяльнай сетцы Truth Social ён напісаў, што Украіна з дапамогай Еўропы можа вярнуць усе страчаныя тэрыторыі. Трамп назваў Расію «папяровым тыграм» з сур’ёзнымі эканамічнымі праблемамі і заявіў, што пры падтрымцы Еўропы і НАТА аднаўленне межаў Украіны цалкам магчымае.
Цяпер чытаюць
У Кіеве за шпіянаж арыштавалі беларускую журналістку Іну Кардаш. Кажуць, з 2015 года яна працавала на КДБ9
Каментары