За 70 кіламетраў ад Мінска прадаецца дзейная база адпачынку. Шыкоўны загарадны комплекс «Хлеб&Soul» пабудавалі пад Плешчаніцамі ў 2022‑м годзе. Рады новых драўляных дамкоў размясціліся на беразе возера Каргаўшчына. База адпачынку прапануе харчаванне і разнастайныя забавы: ад рыбалкі да квадрацыклаў. Прытым цэннік за яе немаленькі: базу гатовыя аддаць за 3,2 мільёна даляраў. Realt.by расказаў, што атрымае пакупнік за гэтыя грошы.
Загарадны комплекс «Хлеб&Soul» знаходзіцца ў Лагойскім раёне Мінскай вобласці, на паўночны захад ад вёскі Акалова. Побач — маляўнічае лясное возера. База адпачынку займае плошчу ў 5,6 га. Тэрыторыя закрытая, абгароджаная і цалкам знаходзіцца пад відэаназіраннем. Да Мінска — 70 кіламетраў.
Пабудавалі комплекс у 2022 годзе. Цяпер ён працуе круглы год. У аб'яве адзначаецца, што гэта — «функцыянуючы прыбытковы бізнэс з цалкам наладжанымі працэсамі з тэрмінам акупнасці 5 гадоў».
На тэрыторыі размешчана адразу 17 дамкоў з асобнымі ўваходамі і асабістымі тэрасамі. Пабудовы выкананыя з натуральных матэрыялаў, кожны дом ужо абсталяваны ўсім неабходным для камфортнага жыцця (двухспальны ложак, 2 тумбачкі, ТБ, wi-fi, санвузел з душам, халадзільнік, шафа для рэчаў). Таксама маецца вялікі дом з трыма спальнымі пакоямі, 2 санвузламі і прасторнай кухняй-гасцёўняй.
У асобным памяшканні знаходзіцца рэстаран з адкрытай тэрасай. Вялікая зала рэстарана змяшчае ў сябе 50 чалавек, малая зала — да 20 чалавек. Тут можна адсвяткаваць любы карпаратыў, вяселле, дні нараджэння і многае іншае. У наяўнасці — гукавое абсталяванне, ТV, Wi-fi.
Таксама ў загарадным комплексе ёсць магчымасць правесці маштабнае мерапрыемства ў новым шатры, які змяшчае ў сябе да 200 гасцей і падыходзіць для вяселля, карпаратыва, юбілею, любога выязнога банкета, паколькі ў ім устаноўленая вялікая прафесійная кухня. Падкрэсліваецца, што ў шатры камфортна ў любое надвор'е, паколькі памяшканне ацяпляецца і абсталявана санвузламі. У наяўнасці — посуд на 200 гасцей, 3 кандыцыянеры, вялізны экран, прафесійнае музычнае абсталяванне.
Ёсць на базе і лазневы комплекс, які змяшчае ў сабе парылку, пакой адпачынку з камінам, распранальню, душавую зону. Разынкай гэтага месца з'яўляецца купель на адкрытым паветры. Гарачая купель-джакузі дадаткова абсталяваная хроматэрапіяй. Таксама маюцца ўсе неабходныя лазневыя прыналежнасці: прасціны, ручнікі, тэпцікі, аромаалеі, венікі.
Побач знаходзіцца і адкрыты басейн з падагрэвам 10 на 3 метры, ён цалкам абсталяваны аўтаматычнай прафесійнай сістэмай ачысткі і таймерам. Герметычны купал дазваляе выкарыстоўваць басейн з красавіка па кастрычнік.
На тэрыторыі загараднага комплексу таксама абсталяваная сажалка для эка-рыбалкі. Яна зарыбленая рознымі відамі рыб. Дадаткова ёсць вуды і ўсе неабходныя снасці. Рыбачыць можна і на лясным возеры.
Вядома, прадугледзелі ўласнікі і зону BBQ. Яна абсталяваная зашклёнай альтанкай на 40 чалавек, мангалам, казаном, рашоткамі і шампурамі.
Не забыліся на базе і пра дзяцей. Для малых — дзіцячая пляцоўка, міні-скаладром, пясочніца, горка і арэлі. Дарослых пацешаць 5 магутных квадрацыклаў і 8 ровараў на розны ўзрост. А для яшчэ больш актыўных гасцей прадугледжаныя валейбольная пляцоўка і футбольныя вароты.
Да гэтага можна дадаць і Chill-пакой, які можна выкарыстоўваць у любое надвор'е. У ім устаноўленыя більярд, аэрахакей, кікер, настольны тэніс, анлайн-кінатэатр, плэйстэйшн і настольныя гульні.
Для абслугоўвання базы адпачынку на тэрыторыі ёсць пральня, гаспадарчы блок 450 квадратаў, а таксама ўся неабходная тэхніка: пагрузчыкі, трактары-газонакасілкі.
Адзначаецца, што новаму ўласніку загараднага комплексу «Хлеб&Soul» дастанецца і сайт з магчымасцю анлайн-браніравання, і база кліентаў, і ўсе акаўнты сацсетак.
Прадаецца комплекс на беразе возера за 3,2 мільёна даляраў.
Цяпер чытаюць
«Ведаеце, як каментуе ваша затрыманне апазіцыя? «Арыштаваны памагаты рэжыму». Турэмная споведзь лідара прафсаюзаў Ярашука1
Каментары