Офіс Ціханоўскай пракаментаваў дэпартацыю часткі палітвязняў без пашпартоў
«Учора рэжым Лукашэнкі адправіў на мяжу 52-х вызваленых палітычных зняволеных. Ужо пасля размоў з першымі з іх, нам стала вядома, што перад дэпартацыяй у некаторых з іх адабралі пашпарты, а ў Мікалая Дзядка супрацоўнікі КДБ і зусім яго парвалі», — гаворыцца ў заяве Офіса Святланы Ціханоўскай.
«Паводле наяўнай інфармацыі, супрацоўнікі КДБ непасрэдна перад выездам канфіскавалі пашпарты, замест якіх ім выдалі толькі часовыя паперы фармату А4, якія не маюць прыкмет паўнавартаснага дакумента, які пацвярджае асобу.
Такая практыка рэжыму Лукашэнкі наўпрост супярэчыць міжнародным абавязанням Беларусі ў галіне правоў чалавека», — гаворыцца ў заяве Офіса.
«Людзей пазбавілі іх нацыянальных пашпартоў і гвалтоўна дэпартавалі. Гэта не толькі грубае прыніжэнне чалавечай годнасці, але і парушэнне базавых правоў чалавека і нормаў міжнароднага права. Беларусь, як краіна падпісала Міжнародны пакт аб грамадзянскіх і палітычных правах, абавязаная забяспечваць свабоду перамяшчэння і паважаць права на грамадзянства. Я разглядаю гэтую практыку як патэнцыйнае парушэнне, якое падпадае пад вызначэнне гвалтоўнага перамяшчэння насельніцтва, прадугледжанае Рымскім статутам. Гэта павінна атрымаць міжнародную прававую ацэнку», — кажа дарадца Святланы Ціханоўскай па прававых пытаннях Леанід Марозаў.
Зараз Офіс Святланы Ціханоўскай удакладняе ўсе дэталі і мае намер прыцягнуць увагу міжнародных арганізацый да гэтага абуральнага парушэння.
Цяпер чытаюць
Лукашэнка абурыўся, што вада з Прыпяці ўцякае ва Украіну1
Лукашэнка абурыўся, што вада з Прыпяці ўцякае ва Украіну
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»2222
Каментары