Кітайскія аўто ўсё часцей сустракаюцца на беларускіх дарогах. Але ці варта іх купляць? Расказваюць уладальнікі
У Беларусі расце колькасць аўто кітайскіх брэндаў. Якія машыны карыстаюцца попытам і якія плюсы і мінусы ёсць у гэтых марак?
Кітайская экспансія беларускіх дарог
Згодна з данымі Беларускай аўтамабільнай асацыяцыі, на долю «БелДжы» прыходзіцца каля 50-55% продажаў новых аўто афіцыйнымі дылерамі. Яшчэ да 25% прыпадае на аўтамабілі кітайскіх марак, якія вырабляюцца непасрэдна ў Кітаі.
Аднак трэба ўлічваць, што імпартам кітайскіх аўто займаюцца не толькі афіцыйныя дылеры. Да таго ж з Кітая ўвозяць і патрыманыя машыны. Таму колькасць аўтамабіляў кітайскіх брэндаў на нашых дарогах павялічваецца ў большай ступені, чым дэманструе статыстыка Беларускай аўтамабільнай асацыяцыі.
Тым не менш, любоў беларусаў да аўто made in China — гэта шмат у чым любоў пад прымусам, да якой аўтааматараў прывялі санкцыі.
Якія маркі і мадэлі ў топе
З кітайскіх брэндаў на нашым рынку лідзіруе Voyah з мадэллю Free. Апроч электраматора, які прыводзіць у рух колы, аўтамабіль мае пад капотам 1,5-літровы бензінавы рухавік, які выконвае ролю генератара, што зараджае батарэю.
Красовер Voyah Free атрымаў папулярнасць праз прывабны знешні выгляд, функцыянальнасць і даволі высокую якасць выканання.
Беларус, які каля двух гадоў валодае такой машынай, кажа, што ў цэлым ёй задаволены, хоць у плане эканамічнасці ёсць пытанні. Асабліва калі размова ідзе пра далёкія паездкі, пры якіх матор-генератар увесь час працуе.
«Расход паліва нічым не меншы, чым у майго папярэдняга красовера, які меў дызельны рухавік», — сцвярджае аўтааматар.
Але галоўным мінусам уласнік Voyah Free называе той факт, што на гэтыя аўто моцна ўпала цана.
Два гады таму Voyah Free ў афіцыйнага дылера прадаваўся па цэнах ад 159 тысяч рублёў. Сярэдні курс даляра ў жніўні 2023 года склаў 3,15 рубля. Атрымліваецца, што Voyah Free тады каштаваў каля 50 500 даляраў.
Сёння цэны на аналагічныя новыя аўто ў дылера пачынаюцца з 108 800 рублёў, што складае каля 36 000 даляраў
Гэта даволі тыповая сітуацыя, калі цэны на кітайскія аўтамабілі моцна знізіліся. Кітайскія аўтавытворцы любяць хутка рабіць рэстайлінг і прадаваць абноўленую версію танней, чым папярэднюю.
Тыя, хто два гады таму аддаў крыху больш за 50 тысяч даляраў за новы Voyah Free, цяпер могуць паспрабаваць выручыць за іх каля 26-28 тысяч даляраў. Гэта амаль у два разы менш.
Уласнік Voyah кажа, што за два гады карыстання яго аўто не мае ржы. Але тыя ж, хто працуе на аўтасэрвісах, заўважаюць, што кітайскія машыны гніюць хутчэй за еўрапейскія.
Які ён, прэміум з Кітая?
Апроч Voyah даволі папулярнымі кітайскімі брэндамі з'яўляюцца Dongfeng, Haval і BYD.
Сярод так званых прэміяльных кітайскіх марак вылучаюць Zeekr і Li Auto.
Беларус, які ў 2023 годзе прывозіў для продажу машыны Zeekr 001, кажа, што сама па сабе машына вельмі цікавая, як з візуальнага, так і з тэхнічнага пунктаў гледжання.
«Гэта сапраўды класны аўтамабіль, але дакладна не за тыя грошы, што ён спачатку каштаваў. Калі пасля Zeekr сядаеш у BMW ці Porsche — пачынаеш разумець, што кітайскім аўтавытворцам пакуль далёка да сапраўднага прэміуму», — мяркуе суразмоўца.
«Кіравальнасць у немцаў лепшая, адчуваецца, што ўсё зроблена прадумана і дасканала. У Zeekr безліч опцый, але калі параўноўваць з Porsche, то адчуваецца нейкая недапрацаванасць.
Прынамсі, па стане на 2023 год, калі розніца ў цане была не такая, як цяпер, то Zeekr для сябе мне не быў цікавы. Па цяперашніх цэнах, магчыма, варыянт нядрэнны. Галоўнае, каб перастаў так хутка губляць у цане», — лічыць аўтааматар.
Мужчына кажа, што закінуў прыгон кітайскіх аўто на продаж праз тое, што кітайскія аўтавытворцы неаднаразова зніжалі цэны на новыя машыны, як з выхадам рэстайлінгу, так і проста праз тое, што ім трэба змагацца за спажыўца.
«Магчыма, цяпер гэты працэс запаволіўся, але год-два таму цэны падалі настолькі хутка, што прывезены нядаўна аўтамабіль, які меў нібыта добры зазор у цане, станавіўся нявыгадны для перапродажу», — тлумачыць аўтамабіліст.
На прыкладзе таго ж Zeekr можна ўбачыць, як вясной 2023 года такія машыны прадаваліся за 74-75 тысяч даляраў. Цяпер рэшткі новых Zeekr 001 (2024 года вытворчасці) прадаюць за 45-51 тысячу даляраў.
А за машыны з прабегам цяпер просяць ад 30 тысяч даляраў.
Якія яшчэ мінусы ў кітайскіх аўто?
Калі размова ідзе пра рэдкія мадэлі, якія не пастаўляюцца ў Беларусь афіцыйна або іх продажы былі вельмі нізкія, то іх уладальнікі сутыкаюцца з адсутнасцю запчастак у наяўнасці, паколькі прадаўцам нявыгадна трымаць іх.
Калі ў дадатак такая мадэль увогуле выпускалася ўсяго 2-4 гады, то дэфіцыт запчастак будзе яшчэ больш адчувальным. Як вынік, з часам ліквіднасць такіх машын будзе на мінімальным узроўні, што зноў жа будзе адбівацца на цане.
Цяпер чытаюць
Мужу Каці Андрэевай, журналісту Ігару Ільяшу далі чатыры гады калоніі1
Каментары
Такой подход во всём китайском.