У Мінску за «здраду дзяржаве» на 9 гадоў асудзілі 60-гадовага праграміста
У Мінскім абласным судзе за «здраду дзяржаве» (ч. 1 арт. 356 Крымінальнага кодэкса) асудзілі 60-гадовага праграміста Дзмітрыя Басько. Яму прызначылі дзевяць гадоў калоніі ва ўмовах узмоцненага рэжыму, штраф у памеры 500 базавых велічыняў (21 тысяча беларускіх рублёў), а таксама пазбавілі вайсковага звання «лейтэнант у адстаўцы». Прысуд быў вынесены 15 траўня гэтага года, але пра яго праваабаронцам стала вядома толькі цяпер, піша «Вясна».
Вядома, што Дзмітрый Басько да затрымання жыў у Мінску, працаваў праграмістам. Таксама ён перыядычна выкладаў праграмаванне ў БДУ на факультэце прыкладной матэматыкі і інфарматыкі.
Перад самым сваім затрыманнем Дзмітрый нідзе не працаваў, бо для ўніверсітэта ён стаў «нядобранадзейным», а многія ІТ-кампаніі пайшлі з Беларусі, таму яму з яго высокай кваліфікацыяй працы не было. Выязджаць з Беларусі ён не хацеў, таму што на той момант даглядаў пажылую маці. Падчас следства над Дзмітрыем яе не стала.
Мужчыну затрымалі 9 студзеня 2024 года і змясцілі ў СІЗА КДБ, дзе яго год утрымлівалі ў жорсткіх умовах. Пасля яго перавялі ў СІЗА-1 у Калядзічах.
Справу ў закрытым рэжыме разглядаў Сяргей Васілеўскі. Дзмітрыя Басько абвінавацілі паводле ч. 1 арт. 356 Крымінальнага кодэкса — «выдача замежнай дзяржаве, міжнароднай або замежнай арганізацыі або іх прадстаўнікам дзяржаўных сакрэтаў Рэспублікі Беларусь, а таксама звестак, якія складаюць дзяржаўныя сакрэты замежных дзяржаў, міжнародных арганізацый, міждзяржаўных утварэнняў, перададзеных Рэспубліцы Беларусь на падставе міжнародных дагавораў Рэспублікі Беларусь або ў сувязі з яе ўдзелам у гэтых міжнародных арганізацыях, міждзяржаўных утварэннях, альбо шпіянаж, альбо пераход на бок ворага падчас вайны або ўзброенага канфлікту, альбо іншае аказанне дапамогі замежнай дзяржаве, міжнароднай або замежнай арганізацыі або іх прадстаўнікам у правядзенні дзейнасці, накіраванай на прычыненне шкоды нацыянальнай бяспецы Рэспублікі Беларусь, наўмысна здзейсненыя грамадзянінам Рэспублікі Беларусь (здрада дзяржаве)».
Сутнасць абвінавачвання і пазіцыя Дзмітрыя па справе праваабаронцам невядомыя.
Мужчына абскарджваў прысуд, але Вярхоўны суд пакінуў яго без зменаў. Прысуд уступіў у сілу 22 чэрвеня гэтага года. Адбываць тэрмін Дзмітрыя адправілі ў шклоўскую калонію № 17.
Цяпер чытаюць
Пракуратура пра смерць Мелказёрава: журналіст меў хранічную хваробу8
Каментары