Адным перад суседзямі сорамна, другія радуюцца кавунам памерам з персік. Беларусы паказваюць ураджай
Анамальна дажджлівае лета ўнесла свае карэктывы ў планы вяскоўцаў і дачнікаў. Беларусы ў сацсетках паказваюць, што атрымалася вырасціць. Але ж нават да няўдач ставяцца з гумарам.
У Таццяны з Віцебшчыны капуста сёлета вырасла такога памеру, што жанчына лёгка трымае ў адной руцэ адразу два качаны — яблыкі часам бываюць большыя.
— Не паспелі беларусы адысці ад думкі, што ў іх бульба сёлета будзе толькі на вялікія царкоўныя святы, дык цяпер небывалы ўраджай капусты на нас наваліўся. Мала таго, што яго да нас нехта еў, але нешта ж і нам засталося. Столькі рэцэптаў у галаве круціцца — нават не ведаю, з якога пачаць. Людзі добрыя, парайце, як захаваць ураджай і нават яго памножыць.
У іншым відэа жанчына паказвае, што з кабачкамі ёй сёлета таксама не пашанцавала. Кажа, нават сорамна перад суседзямі: ужо сярэдзіна жніўня, а прапанаваць ім няма чаго.
У каментарыях людзі пішуць, што таксама засталіся амаль без ураджаю: «Ні гарбузоў, ні кабачкоў. Толькі агуркі ўрадзілі і часнок, ну і цыбулі небагата…». Адна з каментатарак адзначыла, што ўпершыню адчула сябе самотнай, бо ніхто не прапаноўваў кабачкі.
Дарэчы, знаходлівыя беларусы, якія засталіся без кабачкоў, пачалі паказваць у сацыяльных сетках, што з лісця кабачка можна зрабіць дудачку — хаця б дзеці задаволены.
Марыя смяецца і просіць не зайздросціць яе кавунам. Яна дэманструе тры кавуны памерам з персікі. Кажа, што гэта тры розныя гатункі.
Грушы яе таксама не парадавалі: жанчына жартуе, што сёлета яны «чэры». І сліў праз летнія замаразкі засталося няшмат.
Мужчына з Віцебшчыны ў сацсетках жартуе, што ў яго атрымалася вырасціць новы сорт бульбы — «глыба». Разглядзець дробную бульбачку ў зямлі даволі складана.
Яшчэ адна Таццяна расказвае, што звычайна капала бульбу ў верасні, але праз спецыфічнае надвор’е сёлета вырашыла пачаць раней.
— Ураджай мог бы быць большым, але дзякуй і за гэта. Пасля туману ў ліпені і моцных дажджоў добра, што бульба наогул ёсць.
— Шэсць пачкаў фасолі — і ўсяго столькі, нарэшце саспела спаржавая фасоля. Гэта 13 жніўня я буду здымаць — ну вельмі мала, пакрыўджана распавядае яшчэ адна гаспадыня.
Юлія падзялілася ў тыктоку відэа, як яе сястра іранічна хваліцца ўраджаем — на відэа пры гэтым практычна нічога няма.
— Юлька, каб ты разумела: гэта вось перац. Хочаш, дам нават табе палову, бо баюся, што мы ўсё не з’ямо. Бачыла, які вялікі?! На гэтай градцы гуркі. Тут, як ты ўжо здагадалася, цыбуля. Тут вось у мяне кінза. Тут я ўжо не памятаю, што павінна было расці, але ж усё вырасла… Адзінае, што вырасла — гэта шчаўе.
Наталля радуецца ўраджаю цыбулі. Цыбуліны ў яе памерам з кулак.
— Памятаеце, казала, што сёлета цыбуля — гаўно? Прашу прабачэння ў цыбулі. Сёлета хаця б цыбуля ёсць, дзякуй Богу.
Каментатары таксама пішуць, што ў іх цыбулі і часнаку сёлета вырасла шмат.
Ірына кажа, што на Гомельшчыне не чакала сёлета цудаў. Але ў выніку здзіўлена ўраджаем цыбулі.
Шмат хто з беларусаў скардзіцца ў тыктоку на тое, што памідоры загубіла фітафтора. Адзін з мужчын прадэманстраваў, што яго ўраджай яна таксама пашкодзіла. Але спадзяецца, што хаця б на дзве-тры салаты сабраць гародніны атрымаецца.
Але ёсць і тыя, каму пашанцавала. Адна жанчына пахвалілася тым, што ўпершыню змагла вырасціць тамат, які важыць больш за кілаграм.
Затое ў Брэсцкай вобласці Алена з гонарам дэманструе ўраджай персікаў.
А на Магілёўшчыне Наталля пахвалілася ўраджаем нектарынаў.
Застаўся без парэчак. Уладальнік гадавальніка пад Мінскам — пра тое, як надвор’е паўплывала на працу
«Ахранець проста. Купляйце беларускае». Пакупніца абурылася напаўгнілымі кабачкамі ў краме
У крамах будуць прадаваць бульбу «Умка»
Фермеры наракаюць: ураджай будзе малы. Такіх частых замаразкаў не назіралі апошнія 30 гадоў
Каментары