Прэзідэнт Камеруна, якому 92 гады і які кіруе ўжо 43 гады, зноў будзе балатавацца
У выпадку перамогі ён будзе кіраваць да 99 гадоў.
Поль Бія, найстарэйшы дзейны кіраўнік дзяржавы ў свеце, абвясціў пра намер удзельнічаць у прэзідэнцкіх выбарах, прызначаных на 12 кастрычніка 2025 года. Адпаведная заява з’явілася ў нядзелю на яго афіцыйнай старонцы ў сацсетцы X, піша Расійская служба Радыё Свабода.
«Я — кандыдат у прэзідэнты. Мая рашучасць служыць вам такая ж вялікая, як і маштабы выклікаў, з якімі сутыкаецца наша краіна», — гаворыцца ў публікацыі.
Бія займае пасаду прэзідэнта Камеруна з 1982 года. Пасля адмены абмежавання на колькасць прэзідэнцкіх тэрмінаў у 2008 годзе ён атрымаў магчымасць балатавацца неабмежаваную колькасць разоў. У выпадку перамогі ён застанецца ва ўладзе да 99 гадоў. Пытанні пра стан здароўя Бія рэгулярна становяцца прадметам грамадскага абмеркавання, асабліва пасля яго 42-дзённай адсутнасці летась. Улады тады заявілі, што ён адчувае сябе добра, і забаранілі публічнае абмеркаванне гэтай тэмы, спасылаючыся на меркаванні нацыянальнай бяспекі.
Пра вылучэнне Бія даўно хадзілі чуткі, аднак афіцыйнага пацверджання дагэтуль не было. Яго кандыдатуру актыўна падтрымліваюць члены кіруючай партыі — Камерунскага народна-дэмакратычнага руху (CPDM).
Пра намер удзельнічаць у выбарах таксама заявілі некалькі апазіцыйных палітыкаў, уключаючы Маурыса Камто, Джошуа Осі, Акеру Муну і Кабрала Лібіі. Яны рэзка крытыкуюць шматгадовае кіраванне Бія і патрабуюць рэформаў, што забяспечваюць празрыстасць і падсправаздачнасць выбарчага працэсу.
Камерун працягвае сутыкацца з вострымі праблемамі — ад эканамічных цяжкасцяў і сепаратысцкага канфлікту ў англамоўных рэгіёнах да тэрарыстычнай пагрозы на поўначы. Там актыўна дзейнічае радыкальная ісламісцкая групоўка Бока Харам, звязаная з ІДІЛ. Яна выступае супраць свецкай адукацыі і вядомая серыяй крывавых нападаў у рэгіёне возера Чад, у тым ліку на тэрыторыі Камеруна.
Цяпер чытаюць
Кіраўнік Ліды заклікаў сілавікоў не спыняць палітычных рэпрэсій11
Каментары
Ды з яго вахлярам хвароб, каб дажыць да 92.