Затрыманыя дзве групы «тайных пакупнікоў», якія кашмарылі крамы і АЗС
МУС і Следчы камітэт заявілі аб затрыманні дзвюх груп «тайных пакупнікоў», якія займаліся вымагальніцтвам.
«Пры сілавой падтрымцы байцоў «Алмаз», атрадаў спецыяльнага прызначэння ўнутраных войскаў «Беркут» і «Рысь», а таксама АМАПа УУС Міншчыны былі затрыманы 11 падазраваных», — паведамляе прэс-служба МУС.
Спыненая дзейнасць дзвюх арганізаваных груп. Іх удзельнікі вымагалі грошы ў грамадзян і юрыдычных асоб, гандлёвых аб’ектаў і аўтазаправачных станцый у Гродзенскай, Магілёўскай і Мінскай абласцях. Групы паміж сабой не былі звязаныя.
37-гадовы і 42-гадовы мінчукі стварылі шэсць таварыстваў з абмежаванай адказнасцю, якія спецыялізаваліся на продажы навучальных семінараў.
42-гадовы жыхар Мінска, напрыклад, стварыў чатыры ТАА. У адным ён стаў дырэктарам, у іншых кіраўнічыя пасады занялі «свае людзі» — сваякі і сябры фігуранта. Статуты ўсіх юрыдычных асоб, як піша СК, былі складзены «як пад капірку». У якасці асноўнага віду дзейнасці значылася арганізацыя і правядзенне тэматычных асветніцкіх мерапрыемстваў па пытаннях абароны правоў і законных інтарэсаў спажыўцоў на платнай аснове.
«Фігуранты пад выглядам пакупнікоў знаходзілі ў крамах парушэнні правілаў гандлю і пагражалі зрабіць адпаведную запіс у кнігу заўваг і прапаноў. Каб пазбегнуць гэтага, яны патрабавалі ад прадаўцоў набыць у іх навучальныя курсы», — паведамілі ў МУС.
СК больш падрабязна апісаў дзеянні падазраваных падчас «праверак».
«Прадстаўнікі ТАА прыходзілі ў краму, дзе шукалі пратэрмінаваную прадукцыю. Калі такая знаходзілася, яны разыгрывалі сапраўднае прадстаўленне. Пагражаючы запісам у Кнігу заўваг і прапаноў, паведамленнем у санстанцыю пра тавар неналежнай якасці, яны літаральна запалохвалі прадаўцоў і загадчыкаў.
«Кантралёры» часта паводзілі сябе груба, павышалі голас і пагражалі, а пасля адразу ж прапаноўвалі свой «варыянт» вырашэння праблемы. Бо, «выпадкова», арганізацыя, у якой працавалі гэтыя «змагары з пратэрміноўкай», аказвала платныя адукацыйныя паслугі. Заключэнне дамовы на правядзенне навучальнага семінара здымала ўсе пытанні і прэтэнзіі», — гаворыцца ў паведамленні СК.
У камітэце таксама адзначылі, што супрацоўнікі згаданых юрасоб не мелі ніякіх паўнамоцтваў на правядзенне праверак. Акрамя таго, 42-гадовы жыхар Мінска раней прыцягваўся да крымінальнай адказнасці за спробу дачы хабару ў буйным памеры.
Шкода ацэньваецца ў 80 тысяч рублёў.
Праведзены вобшукі ў Гродне, Магілёве, Мінску і Мінскай вобласці. Канфіскаваныя розная валюта ў эквіваленце больш за 60 тысяч рублёў, ювелірныя вырабы, гаджэты і аргтэхніка, амаль два дзясяткі банкаўскіх карт, службовая дакументацыя юрыдычных асоб. Арыштаваныя аўтамабілі агульным коштам больш за 50 тысяч даляраў.
Цяпер чытаюць
«Чакаю тавар ужо 13 дзён». Што пішуць кліенты аб праблемах Wildberries6
Каментары
Усе гэтыя структуры ў нашых медыях, калі гэтыя медыі сапраўды нашыя, мусяць быць персонамі ноно-грата. Пасля таго, што карныя падраздзяленні рэжыму нарабілі ў 2020-м і працягваюць рабіць дагэтуль, нельга гларыфікаваць іхнюю дзейнасць ні ў якім выглядзе. Няўжо пасля пяці гадоў нечувана жорсткай у Еўропе ў ХХІ стагоддзі рэакцыі на няўдалую спробу прававой змены ўлады ў Беларусі сёння камусьці з дэмакратычна налаштаваных беларусаў гэта трэба тлумачыць?