Zatrymanyja dźvie hrupy «tajnych pakupnikoŭ», jakija kašmaryli kramy i AZS
MUS i Śledčy kamitet zajavili ab zatrymańni dźviuch hrup «tajnych pakupnikoŭ», jakija zajmalisia vymahalnictvam.
«Pry siłavoj padtrymcy bajcoŭ «Ałmaz», atradaŭ śpiecyjalnaha pryznačeńnia ŭnutranych vojskaŭ «Bierkut» i «Ryś», a taksama AMAPa UUS Minščyny byli zatrymany 11 padazravanych», — paviedamlaje pres-słužba MUS.
Spynienaja dziejnaść dźviuch arhanizavanych hrup. Ich udzielniki vymahali hrošy ŭ hramadzian i jurydyčnych asob, handlovych abjektaŭ i aŭtazapravačnych stancyj u Hrodzienskaj, Mahiloŭskaj i Minskaj abłaściach. Hrupy pamiž saboj nie byli źviazanyja.
37-hadovy i 42-hadovy minčuki stvaryli šeść tavarystvaŭ z abmiežavanaj adkaznaściu, jakija śpiecyjalizavalisia na prodažy navučalnych sieminaraŭ.
42-hadovy žychar Minska, naprykład, stvaryŭ čatyry TAA. U adnym jon staŭ dyrektaram, u inšych kiraŭničyja pasady zaniali «svaje ludzi» — svajaki i siabry fihuranta. Statuty ŭsich jurydyčnych asob, jak piša SK, byli składzieny «jak pad kapirku». U jakaści asnoŭnaha vidu dziejnaści značyłasia arhanizacyja i praviadzieńnie tematyčnych aśvietnickich mierapryjemstvaŭ pa pytańniach abarony pravoŭ i zakonnych intaresaŭ spažyŭcoŭ na płatnaj asnovie.
«Fihuranty pad vyhladam pakupnikoŭ znachodzili ŭ kramach parušeńni praviłaŭ handlu i pahražali zrabić adpaviednuju zapis u knihu zaŭvah i prapanoŭ. Kab paźbiehnuć hetaha, jany patrabavali ad pradaŭcoŭ nabyć u ich navučalnyja kursy», — paviedamili ŭ MUS.
SK bolš padrabiazna apisaŭ dziejańni padazravanych padčas «pravierak».
«Pradstaŭniki TAA prychodzili ŭ kramu, dzie šukali praterminavanuju pradukcyju. Kali takaja znachodziłasia, jany razyhryvali sapraŭdnaje pradstaŭleńnie. Pahražajučy zapisam u Knihu zaŭvah i prapanoŭ, paviedamleńniem u sanstancyju pra tavar nienaležnaj jakaści, jany litaralna zapałochvali pradaŭcoŭ i zahadčykaŭ.
«Kantralory» časta pavodzili siabie hruba, pavyšali hołas i pahražali, a paśla adrazu ž prapanoŭvali svoj «varyjant» vyrašeńnia prablemy. Bo, «vypadkova», arhanizacyja, u jakoj pracavali hetyja «zmahary z praterminoŭkaj», akazvała płatnyja adukacyjnyja pasłuhi. Zaklučeńnie damovy na praviadzieńnie navučalnaha sieminara zdymała ŭsie pytańni i pretenzii», — havorycca ŭ paviedamleńni SK.
U kamitecie taksama adznačyli, što supracoŭniki zhadanych jurasob nie mieli nijakich paŭnamoctvaŭ na praviadzieńnie pravierak. Akramia taho, 42-hadovy žychar Minska raniej pryciahvaŭsia da kryminalnaj adkaznaści za sprobu dačy chabaru ŭ bujnym pamiery.
Škoda aceńvajecca ŭ 80 tysiač rubloŭ.
Praviedzieny vobšuki ŭ Hrodnie, Mahilovie, Minsku i Minskaj vobłaści. Kanfiskavanyja roznaja valuta ŭ ekvivalencie bolš za 60 tysiač rubloŭ, juvielirnyja vyraby, hadžety i arhtechnika, amal dva dziasiatki bankaŭskich kart, słužbovaja dakumientacyja jurydyčnych asob. Aryštavanyja aŭtamabili ahulnym koštam bolš za 50 tysiač dalaraŭ.
Ciapier čytajuć
Čamu ŭ biełaruskaj turmie tak mocna chudziejuć? Tłumačym11
Kamientary
Usie hetyja struktury ŭ našych miedyjach, kali hetyja miedyi sapraŭdy našyja, musiać być piersonami nono-hrata. Paśla taho, što karnyja padraździaleńni režymu narabili ŭ 2020-m i praciahvajuć rabić dahetul, nielha hłaryfikavać ichniuju dziejnaść ni ŭ jakim vyhladzie. Niaŭžo paśla piaci hadoŭ niečuvana žorstkaj u Jeŭropie ŭ XXI stahodździ reakcyi na niaŭdałuju sprobu pravavoj źmieny ŭłady ŭ Biełarusi siońnia kamuści z demakratyčna nałaštavanych biełarusaŭ heta treba tłumačyć?