Нелегалы? «Наша Ніва» папала пад крытыку левых актывістаў за выкарыстанне выразу «нелегальныя мігранты»
У сувязі з гэтым, калі ласка, выкажыцеся ў апытанцы пад артыкулам, ці варта адмовіцца ад выкарыстання такога выразу.
Адразу заўважым, што выраз «нелегальныя мігранты», «нелегалы» ўжываюць не толькі «Наша Ніва», але і іншыя СМІ, сярод якіх «Люстэрка» і Бі-Бі-Сі.
Левая актывістка і праваабаронца Марына Касінерава нас за гэта раскрытыкавала.
«У мяне ўжо няма сілаў бачыць брыдкую ксенафобію ў дачыненні да ўразлівых груп у медыя, якія павінны прасоўваць дэмакратычныя каштоўнасці (бо аўтарытарызму наеліся нібыта?). На фоне пратэстаў у Амерыцы кожны артыкул НН пра гэты падзеі суправаджаецца рыторыкай Трампа: «нелегалы» і «нелегальныя мігранты, — асуджае Касінерава. — Якімі стандартамі ў журналістыцы кіруецца НН, калі піша пра ўразлівыя групы? — пытаецца яна ў фэйсбуку і дадае. — Калі нормай з'яўляецца расчалавечванне іншых, то ксенафобія на ўсіх узроўнях будзе квітнець і пахнуць».
Яе падтрымалі хімік Сяргей Бесараб, філосафка Вольга Шпарага і фатографка Юлія Дарашкевіч.
Музычны крытык, пісьменніца і журналістка Таццяна Заміроўская піша ў каментарах у фэйсбуку: «Вельмі сумна. Падчас працы рэдактарам сацсетак «Голасу Амерыкі» я натрэніравала ўсю рэдакцыю ўрэшце НІКОЛІ не выкарыстоўваць слоў «нелегалы» і «нелегальныя мігранты», бо гэта расчалавечванне і перанос юрыдычных акалічнасцяў на асобу як адзіны яе вызначальнік, і прапанавала вакабуляр іншых слоў — «мігранты, што нелегальна перайшлі мяжу», «мігранты, што нелегальна працуюць», «мігранты, знаходжанне якіх у ЗША лічыцца ўладамі нелегальным», то бок, прыметнік гэты можна прыстасоўваць да аб'екту ці да дзеяння, але не да жывога чалавека. Усе спрацавала, ніколі мы такога не пісалі. Ну, і нас урэшце зачынілі, карацей)))»
Не ўсе такое меркаванне падзяляюць. Філосаф Пётра Рудкоўскі пярэчыць: «Нелегальныя імігранты», аналагічна як «безбілетнікі», «бяздомныя», «беспрацоўныя» і г.д. — гэта апісальныя катэгорыі, разгорнутая форма якіх была «Асобы, якія нелегальна перасеклі дзяржаўную мяжу», «Асобы, якія ездзяць публічным транспартам без білета». У кагось такія выразы могуць выклікаць адмоўныя асацыяцыі, у іншых — не. Тое, якія асацыяцыі ў каго выклікае, залежыць ад установак і эмацыйнага стану чытача/слухача». Рудкоўскі узгадаў таксама сваю даўнюю палеміку з праваабаронцамі з Human Constanta на гэтую тэму.
«Слова «злачынец» у дачыненні да таго, хто ўчыніў злачынства — мова варожасці?» — іранізуе іншы каментатар.
Што да нас, то «Наша Ніва» ўжывае выраз «нелегальныя мігранты», таму што ён ясны і ёміста акрэслівае тых мігрантаў, якія прыбылі ў тую ці іншую краіну без неабходных для таго дакументаў — без аніякага намеру кагосьці зняважыць.
На нашу думку, выразы кшталту «мігранты, знаходжанне якіх лічыцца ўладамі нелегальным» задоўгія і недарэчныя.
Але мы хацелі б спытацца вашага меркавання. Як вы, чытачы, мяркуеце, ці варта забараніць выраз «нелегальныя мігранты»? Прагаласуйце, калі ласка, у апытанцы пад артыкулам.
Апытанка
«Наша Ніва» і яе пазіцыя ў процістаянні лібералаў і кансерватараў
«Усе мы будзем жыць горш, бядней, з адкатам на 30-40 гадоў назад». Як свет незваротна ідзе да зусім іншай рэальнасці
Лукашэнка патлумачыў, чаму яго не відаць па серадах і суботах
Дык усё ж ці бяспечны Telegram і для якіх мэтаў бяспечны? Вось што ясна на сёння
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць4040
Каментары
Актывістаў розных колераў і ступені леваты шмат, а мы павінны называць рэчы сваімі імёнамі. Не проста "нелегальныя мігранты", а "злачынная зброя ў рукох фашыстоўскай хунты Беларусі і Расеі". Не звяртаем увагі на пляскуноў языкамі!