Нашчадка эмігрантаў з Беларусі прызначылі галоўнакамандуючым аб'яднаных сілаў НАТА ў Еўропе
ЗША прызначылі новага галоўнакамандуючага аб’яднаных сілаў у Еўропе — генерал-лейтэнанта Алексуса Грынкевіча. Гэта рашэнне было станоўча ўспрынята саюзнікамі па НАТА, бо пры цяперашняй палітычнай сітуацыі хадзілі чуткі пра магчымую адмову ЗША ад гэтай ролі, якая заўсёды была за амерыканцамі, піша Euronews.
«Гэта вельмі важная пастанова, і з пункту гледжання НАТА яна выклікае палёгку, бо з'яўляецца пазітыўнай прыкметай амерыканскага ўдзелу і кадравага забеспячэння», — сказала Euronews крыніца ў ЗША, знаёмая з гэтым пытаннем.
Першым галоўнакамандуючым Аб'яднанымі ўзброенымі сіламі НАТА ў Еўропе стаў у 1951 годзе генерал арміі ЗША Дуайт Эйзенхаўэр, і з тых часоў на гэтую пасаду заўсёды прызначаўся амерыканскі военачальнік.
«Пасля завяршэння нацыянальных працэсаў зацвярджэння Грынкевіч заступіць на пасаду ў якасці пераемніка генерала арміі ЗША Крыстафера Кавалі на цырымоніі змены камандавання ў Вярхоўным штабе саюзных дзяржаў у Еўропе ў Монсе (Бельгія), якая адбудзецца летам 2025 года», — гаворыцца ў заяве НАТА.
Алексус Грынкевіч (Alexus Grynkewich) — нашчадак даўніх эмігрантаў з Беларусі. Ягоны прадзед прыехаў у ЗША на мяжы XIX і XX стагоддзяў з Мінска.
Тым часам міністры абароны краін НАТА дамовіліся павялічваць выдаткі на абарону да 5% ад ВУП. З іх 3,5% пойдуць на асноўнае абарончае ўзбраенне, як танкі і супрацьпаветраная абарона, а 1,5% — на інфраструктуру, кіберабарону і іншыя сумежныя сферы бяспекі. Генсек НАТА Марк Рутэ адзначыў, што гэтыя выдаткі неабходныя для падтрымання і ўзмацнення абароны альянсу.
Пасол ЗША пры НАТА Мэцью Уітакер падкрэсліў, што пагрозы ўзрастаюць, і саюзнікі павінны тэрмінова рухацца да пастаўленай мэты. Ён таксама заклікаў Еўропу адыграць важную ролю ў дапамозе Украіне для дасягнення трывалага міру.
Марк Рутэ ўжо не першы раз папярэдзіў, што калі не пачаць дзейнічаць зараз, то праз некалькі гадоў пагроза ўзрасце, і тады «прыйдзецца вучыць рускую мову ці ўцякаць у Новую Зеландыю».
Цяпер чытаюць
Другі вайсковец, які загінуў пры аварыі МАЗа пад Асіповічамі — 21‑гадовы тэнісіст з Віцебска2
Каментары
У рамках сучаснай адміністрацыі што дзядуля што ўнучак могуць аказацца “рускі чалаэк” а НАТА Эўропы акажацца небаяздольным з такім генералам на чале.