Naščadka emihrantaŭ ź Biełarusi pryznačyli hałoŭnakamandujučym abjadnanych siłaŭ NATA ŭ Jeŭropie
ZŠA pryznačyli novaha hałoŭnakamandujučaha abjadnanych siłaŭ u Jeŭropie — hienierał-lejtenanta Aleksusa Hrynkieviča. Heta rašeńnie było stanoŭča ŭspryniata sajuźnikami pa NATA, bo pry ciapierašniaj palityčnaj situacyi chadzili čutki pra mahčymuju admovu ZŠA ad hetaj roli, jakaja zaŭsiody była za amierykancami, piša Euronews.
«Heta vielmi važnaja pastanova, i z punktu hledžańnia NATA jana vyklikaje palohku, bo źjaŭlajecca pazityŭnaj prykmietaj amierykanskaha ŭdziełu i kadravaha zabieśpiačeńnia», — skazała Euronews krynica ŭ ZŠA, znajomaja z hetym pytańniem.
Pieršym hałoŭnakamandujučym Abjadnanymi ŭzbrojenymi siłami NATA ŭ Jeŭropie staŭ u 1951 hodzie hienierał armii ZŠA Duajt Ejzienchaŭer, i z tych časoŭ na hetuju pasadu zaŭsiody pryznačaŭsia amierykanski vojenačalnik.
«Paśla zaviaršeńnia nacyjanalnych pracesaŭ zaćviardžeńnia Hrynkievič zastupić na pasadu ŭ jakaści pierajemnika hienierała armii ZŠA Krystafiera Kavali na cyrymonii źmieny kamandavańnia ŭ Viarchoŭnym štabie sajuznych dziaržaŭ u Jeŭropie ŭ Monsie (Bielhija), jakaja adbudziecca letam 2025 hoda», — havorycca ŭ zajavie NATA.
Aleksus Hrynkievič (Alexus Grynkewich) — naščadak daŭnich emihrantaŭ ź Biełarusi. Jahony pradzied pryjechaŭ u ZŠA na miažy XIX i XX stahodździaŭ ź Minska.
Tym časam ministry abarony krain NATA damovilisia pavialičvać vydatki na abaronu da 5% ad VUP. Ź ich 3,5% pojduć na asnoŭnaje abarončaje ŭzbrajeńnie, jak tanki i supraćpavietranaja abarona, a 1,5% — na infrastrukturu, kibierabaronu i inšyja sumiežnyja śfiery biaśpieki. Hiensiek NATA Mark Rute adznačyŭ, što hetyja vydatki nieabchodnyja dla padtrymańnia i ŭzmacnieńnia abarony aljansu.
Pasoł ZŠA pry NATA Mećju Uitakier padkreśliŭ, što pahrozy ŭzrastajuć, i sajuźniki pavinny terminova ruchacca da pastaŭlenaj mety. Jon taksama zaklikaŭ Jeŭropu adyhrać važnuju rolu ŭ dapamozie Ukrainie dla dasiahnieńnia tryvałaha miru.
Mark Rute ŭžo nie pieršy raz papiaredziŭ, što kali nie pačać dziejničać zaraz, to praź niekalki hadoŭ pahroza ŭzraście, i tady «pryjdziecca vučyć ruskuju movu ci ŭciakać u Novuju Ziełandyju».
Ciapier čytajuć
Byłoha biełaruskaha palitviaźnia sudziać u Litvie za padrychtoŭku da zabojstva praciŭnikaŭ Kramla. Pahražaje až da pažyćciovaha8
Kamientary
U ramkach sučasnaj administracyi što dziadula što ŭnučak mohuć akazacca “ruski čałaek” a NATA Eŭropy akažacca niebajazdolnym z takim hienierałam na čale.