Айцішніца, якая вярнулася з эміграцыі, пахвалілася, што ідзе выступіць на АНТ — у каментарах адкрыўся партал у пекла
Рэсурсная менеджарка і распрацоўшчыца кампаніі iTechArt Group Алеся Лобач падзялілася на старонцы ў Linkedin, што яе паклікалі на АНТ у ток-шоу «Яшчэ не вечар». Дзяўчына рэспектуе Марыі Калеснікавай, але не рашаецца назваць яе прозвішча.
Дзяўчына, па яе словах, трапіць на здымкі «на наступным тыдні». Не выключае яна (ці то жартам, ці то ўсур’ёз) і прыход у эфір да прапагандыста Рыгора Азаронка.
Супрацоўнікаў АНТ прыцягнуў каментар Алесі на тэму эміграцыі, які яна публікавала ў Threads. Айцішніца паспела пажыць у Егіпце і Польшчы і, па яе словах, цяпер лепш асэнсавала, што ў Беларусі лепш.
Адзін з мінусаў, які яна акрэслівае ў дачыненні да Польшчы, напрыклад, забарона на аборты. «Мая сяброўка ледзь не загінула праз гэта, напрыклад», — не ўдакладняе абставіны Алеся, падкрэсліваючы, што ў яе пры гэтым не было праблем з легалізацыяй. «У мяне ёсць сталы побыт па карце паляка — складанасцяў у мяне там не было. Пытанне майго пераезду — у камфорце для мяне».
У каментарах людзі задаюцца пытаннем, навошта па сваёй волі «ісці пэцкацца» на прапагандысцкае тэлебачанне.
«Здымацца ў прапагандысцкіх роліках — вялікая ганьба. Чорная пазнака для шмат якіх беларускіх кампаній на ўсё жыццё», — адзначае адзін з калег Алесі па IT-сферы.
Некаторыя не хаваюць эмоцый абурэння, адзначаючы, што пішуць на адрас аўтаркі допісу першы негатыўны каментар у жыцці:
«Беларусы пакутуюць у турмах, беглі ад рэпрэсій, а вы такая: «У Еўропе дрэнна, у Беларусі — выдатна!» Тое, што ў вас не атрымалася — не значыць, што ў Еўропе дрэнна. Проста вы не пацягнулі. АНТ — памыйніца і прапаганда дыктатарскага рэжыму. Калі вы за Лукашэнку і яго палітыку, рэпрэсіі, супрацу з Расіяй, то тады там вам і месца ў Беларусі».
У адказ Алеся Лобач дастала козыры: «Я з тых, хто бачыць і разумее загадзя, якія наступствы будуць у пэўных дзеянняў. Ці я прымушала беларусаў рабіць тое, за што іх пасадзілі? Я разумела, што мне ёсць што губляць. Хто не асэнсоўваў да канца — мне шкада, што так выйшла».
На яе погляд, сапраўдныя патрыёты, якія змагаюцца за Беларусь, не з’язджалі б з краіны.
«Сапраўдныя патрыёты застаюцца і змагаюцца, як усім вядомая Марыя К., напрыклад (аўтарка, верагодна мае на ўвазе Марыю Калеснікаву, але не рашаецца пісаць яе прозвішча цалкам — НН). А не сядзяць у цяпле і ў іншай краіне і расказваюць іншым, як жыць.
Па словах Лобач, яе працадаўца iTechArt Group не мае нічога супраць здымкаў супрацоўнікаў на прапагандысцкім тэлебачанні. «Таму што думае шырэй ці пад іншым ракурсам».
Кампанія iTechArt Group займаецца распрацоўкай праграмнага забеспячэння і кансалтынгам, спецыялізуецца на вэб– і мабільным праграмаванні.
Цяпер чытаюць
Бяспалаў канчаткова рассварыўся з Ціханоўскім: Для яго добры толькі адзін чалавек — Пракоп'еў55
Каментары
[Зрэдагавана]