Восем беларускіх праваабарончых арганізацый звярнуліся да Палаты прадстаўнікоў у сувязі з праектам закона аб амністыі
«Большасць асуджаных, на якіх не распаўсюджваецца дзеянне законапраекта, былі асуджаныя за рэалізацыю правоў, гарантаваных Канстытуцыяй і міжнароднымі абавязальніцтвамі Беларусі (у тым ліку на свабоду выказвання меркавання і мірныя сходы)», — зазначаюць аўтары звароты.
Восем беларускіх праваабарончых арганізацый звярнуліся да Палаты прадстаўнікоў у сувязі з праектам закона аб амністыі. Копія звароту была накіравана таксама ў Савет Рэспублікі Нацыянальнага сходу Рэспублікі Беларусь і Адміністрацыю Прэзідэнта Рэспублікі Беларусь.
«У цяперашняй рэдакцыі законапраекта выключаная магчымасць прымянення амністыі да асуджаных па шэрагу артыкулаў Крымінальнага кодэкса, якія актыўна выкарыстоўваліся супраць удзельнікаў мірных пратэстаў і людзей, не згодных з дзяржаўнай палітыкай. Такі падыход супярэчыць прынцыпам справядлівасці, гуманізму і павагі да правоў чалавека», — зазначаюць аўтары звароту.
Большасць асуджаных, на якіх не распаўсюджваецца дзеянне законапраекта, былі асуджаныя за рэалізацыю правоў, гарантаваных Канстытуцыяй і міжнароднымі абавязальніцтвамі Беларусі (у тым ліку на свабоду выказвання меркавання і мірныя сходы). Гэтыя людзі не ўжывалі гвалтоўныя метады пры рэалізацыі сваіх правоў.
Значная частка такіх асуджаных цяпер знаходзіцца ў вельмі ўразлівым стане з-за ўзросту, стану здароўя і ўмоваў утрымання, якія могуць быць кваліфікаваныя як жорсткае і прыніжаючае годнасць абыходжанне. Адсутнасць рэальнай медыцынскай дапамогі, цяжкія ўмовы ўтрымання ў месцах пазбаўлення волі ствараюць пастаянную пагрозу для жыцця і здароўя людзей.
Праваабаронцы заклікаюць адмовіцца ад дыскрымінацыйнага падыходу і распаўсюдзіць дзеянне амністыі на ўсіх асобаў, асуджаных па так званых злачынствах «экстрэмісцкай накіраванасці», перагледзеўшы адпаведным чынам абзац 11 артыкула 13 законапраекта, выключыўшы абзац 14 гэтага ж артыкула і словы «а таксама злачынствы экстрэмісцкай накіраванасці» з часткі 3 артыкула 12 законапраекта.
Зварот падпісалі: Беларускі Хельсінкскі камітэт, Прававая ініцыятыва, Праваабарончы цэнтр «Вясна», Respect-Protect-Fulfill, Беларускі ПЭН, Lawtrend, Human Constanta і Беларуская асацыяцыя журналістаў
Цяпер чытаюць
Толькі жмінда і лянівы не падтрымлівае «Нівы»! Вы можаце за хвіліну падтрымаць «НН» падаходным, не патраціўшы ні капейкі сваіх5
Каментары