Беларускі рэжысёр расказаў, як у маладосці пазнаёміўся ў ЗША з адным з самых уплывовых украінцаў
У 1999 годзе беларускі рэжысёр-дакументаліст Максім Швед ездзіў у ЗША па праграме Work and Travel. Там ён пазнаёміўся з будучым украінскім міністрам абароны Рустэмам Умеравым. Згадаць тыя часы рэжысёру дапамог стары плёначны здымак.
Рустэм Умераў з верасня 2023 па ліпень 2025 года быў міністрам абароны Украіны. Ён жа ўзначальваў украінскую дэлегацыю на перамовах у Стамбуле.
Максім Швед запомніў Умерава яшчэ юнаком, калі таму было ўсяго 17 гадоў. Пазнаёміліся яны ў ЗША: Швед ездзіў туды па праграме Work and Travel, а Умераў — па праграме абмену.
Сустрэліся яны дома ў амерыканца Майкла, з якім пазнаёміўся Швед і які акурат у той час прымаў у сябе студэнтаў з Украіны і Германіі. Спачатку беларускі рэжысёр сказаў украінцу, што ён з Чэхіі, таму што не хацеў размаўляць па-руску, але пазней раскрыў праўду.
«Памятаю, што ўразіў ён мяне тым, што ведаў персідскую мову, хоць сам быў з Крыма, і ў яго быў залаты «Ролекс», які тады асацыяваўся з крутой крутасцю», — апісаў тое знаёмства Максім Швед.
Умерава ён запомніў як вельмі пазітыўнага і ветлівага чалавека, на якім часта можна было пабачыць усмешку. Каля тыдня яны правялі разам і пасля больш не стасаваліся.
Некалькі гадоў таму, пачуўшы пра прызначэнне новага міністра абароны Украіны, Швед падумаў: «Падаецца, я такога чалавека ведаю». Загугліў — і сапраўды, супадала апісанне біяграфіі, рысы твару, расказаў ён «Нашай Ніве».
«Не ведаю, колькі шансаў было спыніць недзе пасярод пенсільванскага лесу машыну, якая ў выніку прывязе мяне да такога магутнага поціску рукі, але я веру, што ўсе сустрэчы ў жыцці не выпадковыя», — напісаў Швед у фэйсбуку.
Дзмітрый Лукашэнка хоча паставіць пад кантроль усе мабільныя тэлефоны11
Каментары