Дублёрка Васілеўскай марыць правесці першую хірургічную аперацыю ў космасе
На сённяшні дзень Анастасія Лянкова — самы перспектыўны чалавек у краіне з пункту гледжання гатоўнасці ў космас, сцвярджае СТБ, які пагаварыў з ёй.
Анастасія Лянкова была дублёркай Марыны Васілеўскай у 2024-м і, вядома, свой касмічны палёт не здзейсніла і сказала тэлеканалу, што марыць правесці першую хірургічную аперацыю ў космасе.
Анастасія цяпер працуе ў РНПЦ анкалогіі імя Аляксандрава, а таксама вучыцца ў аспірантуры, піша кандыдацкую дысертацыю, завяршае ардынатуру па прамянёвай дыягностыцы і марыць пра космас.
— Многія рэчы, якія былі зроблены ў бязважкасці (не тое каб зроблены, яны хутчэй былі выпрабаваныя ў бязважкасці) цяпер, на сённяшні момант, прымяняюцца на Зямлі. Таму гэта падаецца, што мы там ужо ўсё адкрылі, усё зрабілі, там вельмі шмат яшчэ чаго ёсць. І самае галоўнае — прымяніць на Зямлі, — кажа Лянкова.
Як хірургу ёй хацелася б правесці першую хірургічную аперацыю ў космасе:
— Такое яшчэ ніхто не праводзіў. Вядома, можа быць, спачатку, натуральна, не на чалавеку, а на жывёле, але адпрацаваць саму методыку, алгарытм, як гэта мы будзем рабіць, гэта было б вельмі выдатна.
Лянкова спадзяецца на з'яўленне беларускага касмічнага атрада ці квот для беларусаў у атрадзе расійскім.
— З цягам часу разумееш, які гэта быў шчаслівы білет, які рэальна падарыў табе магчымасць, гэты шанец, падарыў гэтую мару. І так, з цягам часу я зразумела, што гэта быў выдатны вопыт, які адкрывае вялікія перспектывы, — узгадвае сваю падрыхтоўку да палёту доктарка, якая марыць таксама паляцець у космас.
Цяпер чытаюць
Беларус раптоўна і без дай прычыны знік у 2006 годзе, а праз 19 гадоў знайшоўся ў вёсцы пад Смаленскам3
Каментары