Беларускія сілавікі зламалі рэбры і хрыбетнік коміку Астаніну падчас затрымання ў Беларусі
Беларускія сілавікі так жорстка затрымлівалі коміка Арцемія Астаніна, што зламалі рэбры і хрыбетнік яму падчас затрымання. Расійскі комік быў абвешчаны ў Расіі ў вышук за жарты пра ўдзельнікаў СВА. Астанін спрабаваў збегчы праз Беларусь.
Пра цяжкія траўмы — зламаныя рэбры і хрыбетнік — паведаміў адвакат гумарыста ў судзе пры абранні меры стрымання. На фоне траўмы ў Астаніна пачаліся праблемы з лёгкімі, піша Mash.
17 сакавіка ў Беларусі быў затрыманы комік Арцемій Астанін і перададзены ў Расію. У РФ супраць яго завялі крымінальную справу за жарты. Паводле расійскага СК, на канцэрце Астанін «выказваў негатыўныя і абразлівыя каментары на адрас удзельніка спецыяльнай ваеннай аперацыі».
Крыміналку супраць коміка завялі, імаверна, праз жарт, у якім Астанін распавядае, як у пераходзе метро ён сутыкнуўся з мужчынам, які страціў ногі. Комік не згадвае вайну, але кажа, што мужчына без ног «на міне падарваўся».
Беларускія ж сілавікі пасля затрымання прычапілі на затрыманага стэндапера мясарубку. Арцемій Астанін жартаваў пра адзін з расійскіх рэгіёнаў, дзе маці загінулых акупантаў атрымалі ў падарунак мясарубкі. Але насамрэч, такая гісторыя сапраўды была. У Мурманскай вобласці «Адзіная Расія» падарыла маці загінулых удзельнікаў вайны мясарубкі — у партыі сцвярджаюць, што жанчыны самі пра гэта папрасілі.
Каментары