Новым лідарам кіроўнай Ліберальнай партыі Канады абраны былы кіраўнік Банка Англіі Марк Карні. Ён зменіць на пасадзе прэм’ер-міністра краіны Джасціна Трудо, які ў студзені гэтага года заявіў пра намер пайсці ў адстаўку, піша Бі-бі-сі.
Карні быў адзіным кандыдатам на пасаду лідара партыі, які не ўваходзіў ва ўрад Трудо. Паводле вынікаў галасавання ён набраў 85,9%.
Акрамя зацятага змагання з апазіцыяй на ўсеагульных выбарах, якія адбудуцца ў гэтым годзе, новаму прэм’еру таксама давядзецца весці складаныя перамовы з ЗША аб тарыфах на фоне тэрытарыяльных прэтэнзій Дональда Трампа.
У сваім выступе пасля перамогі Карні абвінаваціў Трампа ў імкненні захапіць Канаду. Гэтая спроба, паводле яго слоў, павінна быць адбітая.
«Амерыканцам патрэбныя нашы рэсурсы, наша вада, наша зямля, наша краіна, — заявіў ён. — Калі б ім гэта ўдалося, яны б знішчылі наш лад жыцця».
«Амерыка — гэта не Канада. Канада ніколі не будзе часткай Амерыкі ні ў якім выглядзе, ні ў якой форме», — дадаў Карні.
59-гадовага Марка Карні ўжо шмат гадоў лічылі патэнцыйным лідарам лібералаў, галоўным чынам дзякуючы яго рэпутацыі ў фінансавай сферы.
Ён пазіцыянаваў сябе як аўтсайдар, які не ўваходзіць у непапулярны ўрад Трудо, і адзначаў, што хоча засяродзіцца на паляпшэнні эканамічнай сітуацыі ў краіне.
Трудо абвясціў пра сваю адстаўку перад агульнанацыянальным з’ездам Ліберальнай партыі. Там павінна было вырашацца пытанне аб перавыбранні партыйнага кіраўніцтва, і прэм’ер, як мяркуюць, хацеў пазбегнуць сітуацыі, калі ўласныя аднапартыйцы знімуць яго з пасады лідара.
Новага лідара павінны былі выбіраць каля 400 тыс. членаў Ліберальнай партыі. У выніку свае галасы падалі каля 150 тыс. чалавек.
Апошнім часам Ліберальная партыя прыкметна страціла папулярнасць. Апытанні грамадскай думкі прадказваюць яе паражэнне на ўсеагульных выбарах, якія павінны адбыцца не пазней за 20 кастрычніка.
Аб’яўляючы пра сваю адстаўку, Трудо прызнаў, што ў краіне ўзнік раскол, парламент фактычна паралізаваны некалькі месяцаў, а кіруючую партыю раздзіраюць унутраныя баталіі.
«Канадзе трэба перавесці дух, а канадцы заслугоўваюць права сапраўднага выбару на наступных выбарах», казаў Трудо.
Хто такі Марк Карні
Карні — канадзец і вядомы эканаміст. Ён быў кіраўніком Банка Канады ў 2008—2013 гадах, у першыя гады пасля сусветнага фінансавага крызісу.
Затым, у 2013—2020 гадах, ён узначальваў Банк Англіі, і яго служба на гэтай пасадзе прыпала на бурныя гады брэксіту.
«Я ўдзельнічаў у вырашэнні многіх крызісаў і выратаванні двух эканомік. Я ведаю, як працуе бізнес, і я ведаю, як прымусіць яго працаваць на вас», — казаў Карні, абвяшчаючы пра вылучэнне сваёй кандыдатуры ў сваім родным горадзе Эдмантан.
У апошнія некалькі месяцаў Карні служыў дарадцам Трудо па эканоміцы, але пасля стаў крытыкаваць былога прэм’ера за яго дзеянні ў гэтай сферы.
«Я — не адзіны член Ліберальнай партыі ў Канадзе, які лічыць, што прэм’ер-міністр і яго каманда занадта часта адцягваліся ад эканомікі», — казаў Карні.
Каментары