«За $50 тысяч ніхто не купіць». Беларускі электракар буксуе: запуск у серыйную вытворчасць зноў перанеслі
Запусціць беларускі электрамабіль у серыйную вытворчасць збіраліся яшчэ ў 2024 годзе. Але тэрміны адкладаюцца.
Серыйны выпуск беларускага электракара запусціцца не раней за 2026 год. Пра гэта расказаў намеснік дырэктара Аб'яднанага інстытута машынабудавання НАН Беларусі Аляксандр Бялевіч.
Паводле яго слоў, пяць тэставых узораў ужо сабралі, цяпер іх выпрабоўваюць на палігонах.
«Каб аўтамабіль пайшоў у серыю, трэба ўкласціся ў аснашчэнне, трэба крыху перабудаваць вытворчыя працэсы тых жа вытворцаў кампанентаў — а гэта вельмі няхуткая справа.
Я б прагназаваў гэта на наступны год нават, пачатак наступнага года, таму што зрабіць тэхналагічнае аснашчэнне — акрамя грошай, гэта час. Мае прагнозы — не раней за наступны год», — заявіў Бялевіч у эфіры Беларускага тэлебачання.
У Акадэміі навук лічаць, што з пункту гледжання канструкцыі беларускі электрамабіль не прайграе кітайскім аналагам, саступае ён пакуль толькі па адзіным паказчыку — цана.
«Мэтавы кошт аўтамабіля, мы б хацелі, каб ён каштаваў у раёне 25-30 тысяч даляраў. Гэта тая цана, у якую мы хочам яго загнаць, і лічым, што тады для рынку ён будзе канкурэнтаздольны», — сказаў Бялевіч.
Ён дадаў, што пакуль невядома, ці атрымаецца зрабіць такую цану для спажыўца.
«Мы вядзем працу з пастаўшчыкамі, з вытворцамі, як выйсці на гэтую цану. Таму што калі наш аўтамабіль будзе каштаваць 40-50 тысяч даляраў, то якія тут меры дзяржпадтрымкі ні ўключай, ён не будзе прадавацца, гэта значыць гэта будзе адзінкавы прадукт», — рэзюмаваў Бялевіч.
Вясной 2024 года тагачасны віцэ-прэм'ер Пятро Пархомчык заяўляў, што першыя ўзоры беларускага электрамабіля з'явяцца да восені, а да канца года яго запусцяць у серыйную вытворчасць.
Каментары