Вядомы амерыканскі пісьменнік Стывен Кінг лічыць, што цырымонію ўручэння прэміі «Оскар» у 2025 годзе сёлета варта адмяніць у сувязі з катастрафічнымі наступствамі пажараў у Лос-Анджэлесе. Пісьменнік заявіў, што не будзе ўдзельнічаць у галасаванні ў знак выказвання сваёй пазіцыі.
«Не галасую сёлета на «Оскары». На маю сціплую думку, яго варта адмяніць. Няма месца бляску, калі Лос-Анджэлес гарыць», — напісаў Кінг у сацсетцы Bluesky.
Меркаванні прадстаўнікоў кінаіндустрыі і карыстальнікаў сацсетак з гэтай нагоды падзяліліся. Некаторыя палічылі, што цырымонію ўручэння «Оскара», наадварот, неабходна правесці, каб падтрымаць індустрыю і рэгіён у цэлым. Мерапрыемства дазволіць сабраць сродкі, якія пойдуць на аднаўленне Лос-Анджэлеса і дапамогу ўсім пацярпелым.
Аргументы на карысць правядзення «Оскара» такія: адмена цырымоніі ўзнагароджання наўрад ці камусьці дапаможа. Затое выкарыстанне маштабнай і глабальнай платформы «Оскара» для збору сродкаў на дапамогу пацярпелым ад пажараў можа якраз прынесці карысць. Таму любыя заклікі да адмены цырымоніі больш падобныя на эмацыйнае жаданне спыніць нешта святочнае, чым на сапраўды карысны крок.
Зрэшты, Амерыканская акадэмія кінематаграфічных мастацтваў і навук пакуль і не збіраецца адмяняць цырымонію, паведамілі крыніцы выдання The Hollywood Reporter. Уручэнне «Оскара» па-ранейшаму запланавана на 2 сакавіка 2025 года.
Лясныя пажары ў прадмесцях Лос-Анджэлеса працягваюцца ўжо дзясяты дзень, і ад іх пацярпелі ў тым ліку і многія галівудскія зоркі, нерухомасць якіх згарэла. Цяпер, праўда, пажарнікі з палёгкай адзначаюць, што ім удалося справіцца з нядаўнімі ўмовамі павышанай небяспекі — моцнымі пустыннымі вятрамі і нізкай вільготнасцю — без значнага росту двух буйных пажараў. Але вярнуцца дадому дзясяткі тысяч эвакуяваных змогуць не раней чым праз тыдзень.
Прыватная кампанія AccuWeather ацэньвае ўжо панесеныя страты ў больш чым 250 мільярдаў даляраў, што робіць цяперашнія пажары ў Лос-Анджэлесе самым дарагім прыродным бедствам у гісторыі ЗША.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары