Памятаеце Мары Кандо, якая вучыла ўвесь свет прыбірацца? Пасля нараджэння трох дзяцей яна перастала хвалявацца наконт парадку
У 2011 годзе японка Мары Кандо пачала вучыць увесь свет мастацтву прыбірацца. Яе кнігі прадавалі мільённымі тыражамі, а Netflix нават зрабіў з Мары аўтарскае тэлешоу. Цяпер у жанчыны трое маленькіх дзяцей, і яе погляды на парадак вельмі моцна змяніліся.
Згодна з біяграфіяй Мары Кандо на яе сайце, цікавіцца парадкам дзяўчынка стала ў пяць гадоў. Ёй вельмі падабаліся маміны глянцавыя часопісы, у якіх было мноства парад пра прыбіранне. У нейкі момант дарослыя заўважылі, што Мары значна больш падабаецца расстаўляць свае лялькі, чым гуляць з імі.
У 15 гадоў Мары прачытала «Мастацтва выкідвання» (кніга была бэстселерам у Японіі) і захапілася гэтай тэмай — яна прачытала ўсе кнігі, якія здолела знайсці.
З часам дзяўчына распрацавала свой метад, які назвала метадам КанМары. У яго аснове ідэя аб тым, што дом неабходна максімальна вызваліць ад лішніх рэчаў. А каб зразумець, выкінуць рэч ці пакінуць, Мары прапаноўвала ўзяць яе ў рукі і спытаць: «Ці дастаўляе яна мне радасць?». Калі не, то трэба падзякаваць рэчы за службу і пазбавіцца ад яе.
Вось з гэтага і пачаўся зорны шлях Кандо. Яна напісала кнігу «Магічнае прыбіранне. Японскае мастацтва навядзення парадку дома і ў жыцці», якая была перакладзена на 44 мовы. У сукупнасці было прададзена больш за 13 мільёнаў копій па ўсім свеце.
Потым Мары напісала яшчэ 8 кніг, а Netflix зрабіў з ёй аўтарскае шоу «Прыбіранне з Мары Кандо».
Гуру сцвярджала:
— Сапраўдная мэта навядзення парадку — прыбраць беспарадак, каб вы маглі жыць тым жыццём, якое хочаце. Калі вы прыводзіце свой дом у парадак па метадзе КанМары, у вас няма іншага выбару, акрамя як прыслухацца да свайго ўнутранага голасу — бо пытанне аб тым, чым вы хочаце валодаць, насамрэч з'яўляецца пытаннем таго, як вы хочаце пражыць сваё жыццё. Калі вы пераацэніце свае рэчы і наведзяце парадак у доме, то падрыхтуеце глебу для велізарнай трансфармацыі.
Цяпер Мары Кандо 39 гадоў, яна маці сына і дзвюх дачок (малодшаму дзіцяці нядаўна споўнілася 2 гады). Жанчына ўсё яшчэ манетызуе свае веды наконт мастацтва прыбірацца. У яе ёсць камерцыйныя адукацыйныя праэкты, а таксама анлайн-крама, у якой можна набыць розныя рэчы для дому — ад сродкаў для прыбірання да розных прыемных дробязяў, якія проста радуюць вока.
На акаўнт Кандо ў інстаграме падпісаны больш за 4 мільёны чалавек. Каралева чысціні (так доўгі час Мары называлі ў інтэрнэце) шчыра прызнаецца, што мацярынства вельмі змяніла яе погляды на парадак. Вось, напрыклад, што яна напісала некалькі дзён таму:
— Гуляць з дзецьмі мне дастаўляе радасці больш, чым штосьці іншае ў гэтым свеце. Метад КанМары заўсёды будаваўся на выбары таго, што прыносіць радасць, і па меры таго, як мяняецца наша жыццё, мяняецца і наш адказ на гэтае пытанне. Калі ў мяне нарадзілася трэцяе дзіця, я амаль не магла спаць, не кажучы аб тым, каб падтрымліваць у сваім доме такі ж парадак, як раней. Я зразумела, што для мяне важней атрымліваць асалоду ад моманту з дзецьмі, чым турбавацца аб беспарадку.
Скончыла пост Мары на аптымістычнай ноце — яна спадзяецца, што рана ці позна ўсё вернецца на свае месцы. Нават калі для гэтага трэба пачакаць, калі дзеці пойдуць у школу — ці хаця б спаць.
«У дзень магу зарабіць 200 еўра». БЧБ-нявеста расказала, кім працуе ў Швейцарыі і як яе сына булілі ў школе
Дзесяць месцаў у ванным пакоі, якія вы, хутчэй за ўсё, прыбіраеце недастаткова добра
«Давайце бясплатна, бо што вы мне зробіце?» Беларускія клінеры падзяліліся дзікімі гісторыямі пра сваіх кліентаў
Пяць ідэй з усяго свету для вясновага генеральнага прыбірання
Цяпер чытаюць
Беларусы ў сацсетках абураюцца, што дэкрэтніцам нібыта плацяць больш, чым тым, хто ходзіць на працу8
Каментары