Генпракуратура завяла шэраг крымінальных спраў супраць Рады БНР, паведаміў журналістам начальнік аддзела па наглядзе за выкананнем заканадаўства аб дзяржаўнай бяспецы Валерый Шуляк, перадае БЕЛТА. Цяпер устанаўліваюць усіх датычных да арганізацыі.
Крымінальныя справы, паводле Генпракуратуры, накіраваны старшыні КДБ для арганізацыі папярэдняга расследавання, устанаўлення і прыцягнення да адказнасці ўсіх, хто мае дачыненне да дзейнасці названага фармавання асоб (дзе б яны ні знаходзіліся: як за мяжой, так і на тэрыторыі Беларусі).
Як паведамілі ў Генпракуратуры, нягледзячы на тое, што Рада БНР сёлета ў ліпені рашэннем Камітэта дзяржаўнай бяспекі Беларусі прызнана экстрэмісцкім фармаваннем, пра што яе кіраўнікам і чальцам дакладна вядома, сваю супрацьпраўную дзейнасць яны не спынілі, паведамляе БЕЛТА.
Паводле Генпракуратуры, «кіраўніцтва Рады каардынуе дэструктыўныя намаганні з іншымі экстрэмісцкімі арганізацыямі, устанаўлівае сувязі з узброенымі структурамі, што дзейнічаюць на тэрыторыі Украіны, у якія ўваходзяць грамадзяне Беларусі».
Рада БНР у паведамленні Генпракуратуры названа «пранацысцкім экстрэмісцкім фармаваннем», дзейнасць якога «заснавана як у мінулым, так і цяпер на адмаўленні існавання суверэннай беларускай дзяржавы».
«Кіраўнік Рады БНР у перакладзе з беларускай на расійскую і іншыя мовы свету абвяшчае сябе «прэзыдэнтам», — піша Генпракуратура.
Паводле Генпракуратуры, дзеянні кіраўнікоў і сябраў Рады БНР утрымліваюць прыкметы наступных складаў злачынстваў:
змова ці іншыя дзеянні з мэтай захопу дзяржаўнай улады (ч. 1 арт. 357 КК);
кіраўніцтва экстрэмісцкім фармаваннем, а таксама фармаваннем, дзейнасць якога накіравана на рэабілітацыю нацызму, альбо ўдзелу ў ім (ч. 1 арт. 361-1 КК);
уцягванне ў экстрэмісцкую дзейнасць і іншае садзейнічанне такой дзейнасці, здзейсненае групай асоб (ч. 2 арт. 361-4 КК);
распальванне нацыянальнай, рэлігійнай альбо іншай сацыяльнай варожасці або варожасці, здзейсненае групай асоб (ч. 1 арт. 130 КК);
наўмысныя дзеянні па рэабілітацыі нацызму, учыненыя групай асоб (ч. 3 арт. 130-1);
падбухторванне да ўдзелу грамадзян Рэспублікі Беларусь на тэрыторыі замежнай дзяржавы ва ўзброеным фармаванні аднаго з супрацьлеглых бакоў, а таксама да ўдзелу ва ўзброеным канфлікце, ваенных дзеяннях без упаўнаважання дзяржавы (ч. 5 арт. 16, ч. 1 арт. 361-3 КК);
дыскрэдытацыя Рэспублікі Беларусь (арт. 369-1 КК).
Цяпер чытаюць
Як сёння жывуць Кузнечыкі, якія амаль два гады хаваліся ў пасольстве Швецыі, каб не трапіць у кіпцюры сілавікоў?1
Каментары