Міністр абароны Літвы: На кожнага мёртвага Прыгожына з'явіцца новы Прыгожын
Міністр абароны Літвы Арвідас Анушаўскас, каментуючы гібель камандзіра ПВК «Вагнер» Яўгена Прыгожына, адзначае, што рана ці позна ягонае месца будзе занятае. На думку міністра, на бяспеку Літвы ўплывае не смерць Прыгожына, а вайна ва Украіне, піша Delfi.lt.
«На кожнага мёртвага Прыгожына з'явіцца новы Прыгожын. Яго месца могуць заняць іншыя асобы, на іншых падставах, магчыма, з іншымі сувязямі з Мінабароны Расіі», — міністр пракаментаваў смерць лідара групоўкі «Вагнер». Паводле яго, група наймітаў небяспечная, але агульная сітуацыя з бяспекай Літвы прадыктаваная вайной ва Украіне.
«Мы шмат гаворым аб гэтай групоўцы — так, яна небяспечная, так, у некаторых краінах яна абвешчаная тэрарыстычнай. Аднак агульная сітуацыя з бяспекай дыктуецца вайной ва Украіне, і ўсе астатнія дзеянні звязаныя з гэтым», — сказаў Анушаўскас.
Кіраўніца літоўскага МУС Агне Білатайце падкрэсліла, што, нягледзячы на смерць лідара ПВК «Вагнер», Літва ўвесь час адчувае пагрозу з боку агрэсіўных рэжымаў у Беларусі і Расіі.
«Мы жывем побач з такімі суседзямі, як беларускі рэжым і Расійская Федэрацыя, таму ўвесь час адчуваем пагрозы, існуе пастаянная небяспека», — сказала ў пятніцу Білатайце.
«Але мы рэагуем адэкватна, усе нашы ўстановы і службы гатовыя. А што тычыцца будучыні, то мы сапраўды складаем розныя сцэнары і разумеем, што ў гэтым кантэксце трэба быць пільнымі і расслабляцца нельга», — падкрэсліла міністарка.
Па ўласніку «Софтклуба» Сіротку, які сядзіць у СІЗА КДБ, прыляцела і ад Польшчы — на яго крыптабіржу Bynex наклалі санкцыі2
Каментары