«Заб'юць — ок, не заб'юць — вялікі дзякуй». Былы «вагнеравец» Мядзведзеў заявіў, што хоча вярнуцца з Нарвегіі ў Расію
Пасольства Расіі ў Нарвегіі пацвердзіла агенцтву «РІА Навіны», што былы камандзір аддзялення ПВК «Вагнер» Андрэй Мядзведзеў мае намер вярнуцца ў Расію.
У сераду Мядзведзеў, які прасіў прытулак у Нарвегіі пасля ўцёкаў з Расіі, апублікаваў відэазварот, у якім заявіў, што хоча вярнуцца на радзіму, нават калі гэта ўяўляе небяспеку для яго жыцця, піша Бі-бі-сі.
«У цэлым паглядзім, як яно пойдзе ў Расіі. Заб'юць — ок, не заб'юць — вялікі дзякуй. Дадуць жыць — яшчэ больш дзякуй», — кажа Мядзведзеў у роліку, размешчаным на YouTube.
26-гадовы Мядзведзеў таксама сказаў, што вакол яго «адбываецца шмат незразумелага». «Я сябе адчуваю нейкім хлопчыкам у нейкай вялікай гульні вялікіх дзядзечак. Удзельнічаць я ў гэтым не хачу. Сведчыць супраць чаго-небудзь я не хачу», — заявіў былы «вагнеравец».
13 студзеня Мядзведзеў незаконна перайшоў мяжу паміж Нарвегіяй і Расіяй. Нарвежскім уладам ён заявіў, што быў наймітам ПВК «Вагнер» і браў удзел у ваенных дзеяннях на тэрыторыі Украіны.
Паводле яго, ён быў сведкам пазасудовай расправы, якая ўчынялася наймітамі, а таксама іншых злачынстваў ва Украіне. Ён выказваў асцярогі, што вяртанне ў Расію будзе азначаць для яго гібель ад рук людзей заснавальніка ПВК «Вагнер» Яўгена Прыгожына.
Улады Нарвегіі заяўляюць, што зацікаўленыя ў паказаннях Мядзведзева як важнага сведкі ваенных злачынстваў, учыненых Расіяй.
Па словах Мядзведзева, ён мае намер адклікаць сваё прашэнне аб палітычным прытулку ў Нарвегіі.
У другой палове дня ў чацвер Мядзведзеў таксама даў інтэрв'ю кіраўніку праекта Gulagu.net Уладзіміру Асечкіну, у якім пацвердзіў, што ўжо звязаўся з прадстаўнікамі амбасады Расіі. Запіс заканчваецца словамі Мядзведзева, што па яго «ўжо прыехалі».
Мядзведзеў заявіў Асечкіну, што вырашыў вярнуцца на радзіму, бо хоча быць побач з сям'ёй — братам і сёстрамі. У інтэрв'ю ён таксама пытаецца Асечкіна: «Ты ведаеш, так, што такое страціць блізкага чалавека?» Пры гэтым не тлумачыць, што менавіта мае на ўвазе, і адзначае, што «не хоча, каб гэта публікавалі».
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»30
Каментары