Навукоўцы стварылі прэпарат, які дазваляе есці салодкае і не таўсцець
Паддоследныя мышы засталіся худымі пры доўгім і частым ужыванні высокакаларыйнай ежы.
Навукоўцы з Цэнтра медыцынскіх навук Універсітэта Тэхаса ў Сан-Антоніа, а таксама даследчыкі з Пенсільванскага і Карнельскага ўніверсітэтаў стварылі прэпарат, які прадухіляе атлусценне і негатыўныя змены печані ў мышэй, якіх усё жыццё кармілі высокакаларыйнай ежай. Вынікі даследавання апісваюцца ў артыкуле, апублікаваным у навуковым часопісе Cell Reports.
Даследчыкі высветлілі, што лішак магнію запавольвае выпрацоўку АТФ у мітахондрыях. Выдаленне гена MRS2, які неабходны для транспарціроўкі магнію ў арганізме, прывяло да больш эфектыўнага метабалізму цукру і тлушчу. У выніку паддоследныя жывёлы сталі больш стройнымі. Іх печань і тлушчавыя тканкі не паказалі прыкмет тлушчавай хваробы печані, якая з'яўляецца пры няправільным харчаванні, атлусценні і дыябеце другога тыпу.
Для таго, каб паўтарыць падобны эфект, даследчыкі распрацавалі прэпарат CPACC, які абмяжоўвае паступленне магнію ў мітахондрыі. Мышы, якіх кармілі ежай з перавагай цукру і тлушчу, заставаліся худымі пасля ўвядзення гэтага эксперыментальнага прэпарату.
«CPACC здольны знізіць рызыку такіх кардыяметабалічных захворванняў, як інфаркт і інсульт, а таксама знізіць рызыку захворвання на рак печані, які часта ўзнікае з прычыны тлушчавай хваробы печані», — заяўляюць даследчыкі, працягваючы ўдасканальваць эфект ад прэпарату.
Нагадаем, што навукоўцы шляхам эксперыментаў на мышах апошнім часам змаглі дабіцца значных поспехаў па розных напрамках даследаванняў. Напрыклад, стала магчымым спыніць у мышэй працэс старэння, паспяхова выпрабаваць прэпарат для амаль поўнага працверажэння ад алкаголю і нават стварыць здаровае патомства толькі ад двух мышэй-самцоў.
Чытайце яшчэ:
Штодзённае спажыванне адной і той жа ежы можа выклікаць дэпрэсію
Цяпер чытаюць
Экс-палітвязень адкрыў збор на сябе — іншыя палітвязні абураныя і кажуць, што ён стукач і махляр2
Каментары