«Абставіны не дазваляюць прыняць іншае рашэнне». Германія адмовілася прымаць спаборніцтвы з-за допуску да іх расіянак і беларусак
Германія адмовілася прымаць этап жаночага Кубка свету па фехтаванні з-за допуску да спаборніцтваў спартсменак з Беларусі і Расіі. Прэзідыум Федэрацыі фехтавання Германіі (DFB) праінфармаваў пра гэта Сусветную федэрацыю фехтавання (FIE).
Этап Кубка свету па фехтаванні на рапірах сярод жанчын павінен быў прайсці ў маі ў горадзе Таўбербішафсхайм. Але не пройдзе.
«Дыскусіі апошніх некалькіх дзён пасля пастановы Кангрэса FIE зноў дазволіць удзел Расіі і Беларусі выклікалі гарачыя дыскусіі як унутры краіны, так і за яе межамі», — растлумачыла кіраўніца Федэрацыі фехтавання Германіі Клаўдыя Бокель.
«Мы хочам паслаць выразны сігнал, што мы аддалі б перавагу іншаму выніку і што мы ўсё яшчэ бачым вялікую колькасць адкрытых пытанняў па рэалізацыі, таксама з боку сусветнай федэрацыі, якія робяць немагчымым правядзенне турніру… Як бы нам ні хацелася прадставіць нашых найлепшых спартсменак нямецкай публіцы і даць ім магчымасць выкарыстоўваць дамашнюю перавагу на шляху да Алімпійскіх гульняў у Парыжы, абставіны не дазваляюць прыняць іншае рашэнне».
10 сакавіка на пазачарговым кангрэсе Міжнароднай федэрацыі фехтавання было прынятае рашэнне дазволіць спартсменам з Беларусі і Расіі ўдзельнічаць у спаборніцтвах пад эгідай федэрацыі. За рашэнне прагаласавала 89 чалавек, супраць — 46.
У Міжнароднай федэрацыі фехтавання традыцыйна моцныя расійскія ўплывы, шмат гадоў яе ўзначальваў вядомы расійскі алігарх Алішэр Усманаў.
Каментары