Зарэгістравалі кампанію, якая можа стаць пераемніцай «Слаўкалія»
Прадстаўнікі ўрада Беларусі ўвайшлі ў органы кіравання ААТ «Нетры Нежын» — новай кампаніі, зарэгістраванай 22 лістапада ў Рачэнскім сельсавеце Любанскага раёна за 4 км на паўднёвы ўсход ад вёскі Обчын. Там жа, на паўднёвы ўсход ад Обчына, знаходзіцца Нежынскі горна-абагачальны камбінат, які будавала кампанія «Слаўкалій», піша Office Life.
Звесткі пра рэгістрацыю новай кампаніі ёсць у Адзіным рэестры дзяржрэгістрацыі юрыдычных асоб і індывідуальных прадпрымальнікаў. Асноўны від дзейнасці кампаніі — здабыча мінеральнай сыравіны для хімічнай вытворчасці і вытворчасці ўгнаенняў.
У пастанове Саўміна, апублікаванай 5 снежня на pravo.by, сказана, што інтарэсы Беларусі ў «Нетры Нежын» будуць прадстаўляць намеснік міністра архітэктуры і будаўніцтва Аляксандр Шваюнаў, першы намеснік міністра фінансаў Дзмітрый Кійко, першы намеснік міністра эканомікі Юрый Чабатар, а таксама першы намеснік старшыні Дзяржкаммаёмасці Пётр Броўкін.
Нежынскі ГАК павінен стаць другім у Беларусі (пасля дзяржаўнага «Беларуськалія») прадпрыемствам па вытворчасці калійных угнаенняў. Запуск ГАК магутнасцю да 2 млн тон хлоркалію ў год раней быў запланаваны на 2023 год. Гэта найбуйнейшы ў СНД праект, які рэалізуецца прыватнай кампаніяй.
Інвестыцыі ў праект ацэньваліся ў 2 млрд даляраў, з іх 600 млн даляраў — уласныя сродкі і 1,4 млрд даляраў — крэдыт Банка развіцця Кітая, прыцягнуты праз Беларусбанк. Выплаты па крэдыце павінны былі пачацца ў мінулым годзе, поўнае пагашэнне запланавана на 2031 год.
Інвестпагадненне па калійным праекце беларускі ўрад заключыў з брытанскай GCM Global Energy. Яна кантралюе кампанію GCM Global Energy Slavkali, якой на 100% належыць ЗТАА «Слаўкалій». Заснавальнік кампаній — расійскі алігарх Міхаіл Гуцэрыеў. І сам Гуцэрыеў, і «Слаўкалій» цяпер пад заходнімі санкцыямі.
Публічнай заявы аб пераходзе праекта Нежынскага ГАКа ад ЗТАА «Слаўкалій» да іншай юрыдычнай асобы не было, але крыніца ў галіне пацвердзіла расійскаму «Інтэрфаксу», што кампанія «Нетры Нежын» з'яўляецца пераемнікам «Слаўкалія».
-
«Санта Брэмар» хоча адсудзіць правы на брэнд у вядомага расійскага вытворцы, якога прызналі экстрэмісцкім за падтрымку УСУ
-
Амерыканскаму ўласніку парку «Сула», выхадцу з Беларусі, прадалі будынкі былога яўрэйскага гета ў Навагрудку
-
Губернатар Прыморскага краю РФ расказаў, што там з будаўніцтвам беларускага порта
Каб не плаціць падатак на сабак, мінчукі пачалі здаваць іх у пункты адлову25
Каментары