Zarehistravali kampaniju, jakaja moža stać pierajemnicaj «Słaŭkalija»
Pradstaŭniki ŭrada Biełarusi ŭvajšli ŭ orhany kiravańnia AAT «Nietry Niežyn» — novaj kampanii, zarehistravanaj 22 listapada ŭ Račenskim sielsaviecie Lubanskaha rajona za 4 km na paŭdniovy ŭschod ad vioski Občyn. Tam ža, na paŭdniovy ŭschod ad Občyna, znachodzicca Niežynski horna-abahačalny kambinat, jaki budavała kampanija «Słaŭkalij», piša Office Life.
Źviestki pra rehistracyju novaj kampanii jość u Adzinym rejestry dziaržrehistracyi jurydyčnych asob i indyvidualnych pradprymalnikaŭ. Asnoŭny vid dziejnaści kampanii — zdabyča minieralnaj syraviny dla chimičnaj vytvorčaści i vytvorčaści ŭhnajeńniaŭ.
U pastanovie Saŭmina, apublikavanaj 5 śniežnia na pravo.by, skazana, što intaresy Biełarusi ŭ «Nietry Niežyn» buduć pradstaŭlać namieśnik ministra architektury i budaŭnictva Alaksandr Švajunaŭ, pieršy namieśnik ministra finansaŭ Dźmitryj Kijko, pieršy namieśnik ministra ekanomiki Juryj Čabatar, a taksama pieršy namieśnik staršyni Dziaržkammajomaści Piotr Broŭkin.
Niežynski HAK pavinien stać druhim u Biełarusi (paśla dziaržaŭnaha «Biełaruśkalija») pradpryjemstvam pa vytvorčaści kalijnych uhnajeńniaŭ. Zapusk HAK mahutnaściu da 2 młn ton chłorkaliju ŭ hod raniej byŭ zapłanavany na 2023 hod. Heta najbujniejšy ŭ SND prajekt, jaki realizujecca pryvatnaj kampanijaj.
Inviestycyi ŭ prajekt aceńvalisia ŭ 2 młrd dalaraŭ, ź ich 600 młn dalaraŭ — ułasnyja srodki i 1,4 młrd dalaraŭ — kredyt Banka raźvićcia Kitaja, pryciahnuty praź Biełarusbank. Vypłaty pa kredycie pavinny byli pačacca ŭ minułym hodzie, poŭnaje pahašeńnie zapłanavana na 2031 hod.
Inviestpahadnieńnie pa kalijnym prajekcie biełaruski ŭrad zaklučyŭ z brytanskaj GCM Global Energy. Jana kantraluje kampaniju GCM Global Energy Slavkali, jakoj na 100% naležyć ZTAA «Słaŭkalij». Zasnavalnik kampanij — rasijski aliharch Michaił Huceryjeŭ. I sam Huceryjeŭ, i «Słaŭkalij» ciapier pad zachodnimi sankcyjami.
Publičnaj zajavy ab pierachodzie prajekta Niežynskaha HAKa ad ZTAA «Słaŭkalij» da inšaj jurydyčnaj asoby nie było, ale krynica ŭ halinie paćvierdziła rasijskamu «Interfaksu», što kampanija «Nietry Niežyn» źjaŭlajecca pierajemnikam «Słaŭkalija».
Były biełaruski vajar sutki katavaŭ svajho siabra, a paśla zabiŭ siabie1
Kamientary