Лукашэнка прапанаваў раздаць беларусам землі «дзесьці пад Смаленскам»
Урад прапануе сур'ёзную карэкціроўку заканадаўства ў сферы зямельных адносін. Адпаведныя пытанні былі вынесеныя на нараду ў Аляксандра Лукашэнкі, піша БелТА.
Сярод іншага было ўзнятае пытанне наконт таго, каб для будаўніцтва прыватных дамоў дазволіць выдзяляць участкі плошчай да аднаго гектара.
«Хацелася б, каб губернатары ўключыліся і сказалі: у нас дастаткова зямельных рэсурсаў, каб, не знішчаючы лясы, надзяліць жадаючых аж да аднаго гектара. Па-мойму, мы сёння і па 6-10 сотак не можам забяспечыць жадаючых (там, дзе яны хочуць, прынамсі). Таму хацелася б пачуць адказ на гэтае пытанне», — сказаў Лукашэнка.
Таксама, паводле яго слоў, калі дазваляюць памеры ўчастка, то можна дазволіць будаваць там другі жылы дом:
«Такіх выпадкаў было нямала. І ў Брэсцкай вобласці, я памятаю, мы прымалі рашэнні. Калі жывуць бацькі, у яго паўгектара, сын хоча нешта там пабудаваць — немагчыма. Давялося прымаць падобныя рашэнні. Вось тут пытанне ёсць. Гэта пытанне трэба вырашаць. Калі дастаткова зямельнага ўчастка, бацькі жывуць і сын ці дачка хоча пабудаваць дом або прыбудову нейкую зрабіць. Магчыма. Гэта яго ўчастак».
Аляксандр Лукашэнка нагадаў, што яго патрабаванне было не ў тым, каб пад Мінскам выраслі новыя гарады і ўтварылася мегаагламерацыя з насельніцтвам пад трэць дзяржавы:
«Я даручаў прадумаць стымулюючыя механізмы, каб разгрупаваць людзей па краіне, — падкрэсліў ён. — Можа, недзе пад Смаленскам (гаворка пра тэрыторыю Беларусі паблізу граніцы з Расіяй недалёка ад горада Смаленска. — робіць заўвагу БелТА) і трэба танна прадаць участак і бясплатна перадаць. І такіх зямель у нас дастаткова».
«У нас дастаткова такіх вось вёсачак далёкіх, хутароў і проста прыгожых месцаў за 150-200 кіламетраў ад буйных гарадоў, якія асвойваліся і асвойваюцца людзьмі. І яны мелі там свой куток, прыводзілі яго ў парадак, былі гаспадарамі на ўласнай зямлі», — нагадаў Лукашэнка.
Ён дадаў, што ў краіне ўжо ёсць паспяховы вопыт развіцця пасёлкаў гарадскога тыпу і тэрыторый вакол іх, і там ёсць шмат участкаў, якія можна аддаць людзям. «Вось для нас што сёння важна. Гэта ўсё размеркаваць», — падкрэсліў Лукашэнка.
Больш таго, участкі, якія можна было б уключыць у абарот, ёсць і ў непасрэднай блізкасці ад Мінска, калі па-гаспадарску падысці да пытання. Часам такія ўчасткі менш зручныя для будаўніцтва і патрабуюць дадатковых укладанняў.
«А ў нас што, мала багатых людзей? Толькі прапануй і пакажы. Ён прыйдзе, купіць і яшчэ ў два разы даражэй заплаціць, — заўважыў ён. — Таму трэба размеркаваць і заняць участкі зямель, якія сёння не ўключаныя ў абарот, дзе ёсць пад'езд, дарога. Нават да самага маленькага хутара хоць нейкая палявая дарога ёсць. А што туды падведзеная электрычнасць — сто працэнтаў. Таму што там жылі людзі. Там проста для таго, каб паслухаць цішыню і падыхаць свежым паветрам, любы багаты чалавек можа купіць гэты хутарок».
Цяпер чытаюць
Яўген Афнагель расказаў, што было пасля суда, дзе скандавалі «Верым, можам, пераможам!» І назваў, хто для яго сапраўдны лідар Беларусі1
Каментары