Прапаганда накінулася на А1 і заклікае нацыяналізаваць кампанію. Наколькі гэта магчыма?
Пасля арышту прэс-сакратара сотавага аператара А1 Мікалая Брэдзелева ад праўладных каментатараў сталі паступаць заклікі да нацыяналізацыі гэтага бізнэсу. Ці рэальны гэты сцэнарый?
Абазнаны суразмоўца «Нашай Нівы» лічыць, што заклікі да «нацыяналізацыі» бізнеса — гэта ўсё толькі скуголенне прапагандыстаў, якія далёкія ад разумення такіх працэсаў і дзейнічаюць па інэрцыі, у сваім рэжыме пошуку ворагаў народа.
«Наступстваў для бізнеса я не бачу. Арышт прэс-сакратара на дзейнасці А1 ніяк не скажацца. Гэта прыкладна як арыштаваць дзяўчынку з кол-цэнтра. Гэта не топ-менеджар, — кажа наш суразмоўца. — Але і саджаць нікога з топ-менеджараў сэнсу няма.
А1 гэта не «Сігмаполюс» і не Green. Няма такога механізма, як з нашымі бізнэсменамі — пасадзіў бенефіцыяра і чакаеш «выкупу» у выглядзе налічанай «кампенсацыі шкоды».
Па словах крыніцы «Нашай Нівы», з міжнароднымі кампаніямі пасадка каго заўгодна ў Беларусі сэнсу не мае. А1 — гэта частка аўстрыйскай A1 Telekom Austria, якая, у сваю чаргу, — «дачка» A1 Telekom Austria Group, а тая — «дачка» Amеrica Mоvil. Наехаць на А1 — гэта ў выніку азначае наехаць на амерыканцаў.
«І дзеля чаго? Мабільная сувязь — гэта не біржавы тавар, які можна працягнуць прадаваць і так, проста замяніўшы ўласніка, — лічыць наш кансультант. — Тэлекамунікацыі — гэта складаны бізнэс з процьмай двухбаковых дамоваў, пачынаючы з роўмінгу. Гэта праграмнае забеспячэнне і складанае абсталяванне, якое гарантавана трапіць пад санкцыі ў выпадку аднімання.
Табе нічога не паставяць, табе нічога не падтрымаюць, партнёры адмовяцца ад супрацоўніцтва — бізнэс ляснецца. Можна чакаць, што ў выпадку нацыяналізацыі ці знішчэння пад санкцыі трапіць уся галіна, і МТС памрэ следам — ён напалову дзяржаўны».
Цяпер чытаюць
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый67
Каментары