Легендарны трэнер Спартак Мірановіч падтрымаў Лукашэнку: Можа, людзей білі, а можа — не. Хто можа даказаць?
3 снежня пад зваротам спартсменаў, якія выступілі ў падтрымку Аляксандра Лукашэнкі, з’явіўся подпіс легендарнага гандбольнага трэнера Спартака Мірановіча.
З ягоным імем звязаныя ўсе значныя поспехі мінскага СКА, а таксама зборнай Беларусі. «Наша Ніва» распытала 82-гадовага настаўніка пра ягоную грамадзянскую пазіцыю.
«На тое, што было пасля выбараў, глядзеў па-рознаму. Цяпер ва ўсім свеце нешта адбываецца.
Можа, сілавікі і білі людзей, а можа — не. Хто гэта можа даказаць? Калі б я бачыў гэта асабіста, то сказаў бы. Ёсць розныя людзі, мабыць, нехта біў, нехта — сварыўся.
Я не хачу нейкіх тэрміновых шараханняў, новых выбараў. Вам жа кажуць, што будуць змены ў Канстытуцыю. Мне здаецца, што ўсё пакуль ідзе нармальна, упэўнены, што большасць людзей прыме правільнае рашэнне.
Мы сапраўды выступалі ў Барселоне як беларусы пад бел-чырвона-белым сцягам. Я тады не думаў, што гэта за сцяг. Я не звяртаў на гэта ўвагу: тады ўспрымалася, што сёння такі, а заўтра — іншы. Бел-чырвона-белы я ўспрымаю як сімвал пратэсту. А тое, што фашысты яго выкарыстоўвалі, то толькі цяпер даведаўся.
Я бачыў, што некаторыя спартсмены былі супраць [Лукашэнкі]. Ім паказалі адзін бок, — што сілавікі там нешта рабілі, — і яны ўжо выказваюцца. А гэта адразу не робіцца, трэба ўсё ўзважыць.
26 гадоў ва ўладзе? Усё па законе павінна быць. Будзе два тэрміны — значыць, два. Але амаль ва ўсіх постсавецкіх краінах кіраўнікі сядзяць па шмат гадоў».
Цяпер чытаюць
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы79
Каментары