Лідэр маладзёжнай арганізацыі Партыі БНФ «Моладзь БНФ» Франак Вячорка прыняў прысягу 7 лютага ў 8‑й радыётэхнічнай брыгадзе ў Баранавічах.Адсюль ён будзе накіраваны ў Мазыр для праходжання тэрміновай службы ў ваеннай часці № 48694 супрацьпаветранай абароны.
Як паведаміў БелаПАН Ф.Вячорка, сёння ў часць да яго прыехалі бацькі і сябры — усяго каля 30 чалавек. Прысягу лідэр маладзёжнай арганізацыі прымаў на беларускай мове. «Пад канец прысягі замест слоў «Служу Рэспубліцы Беларусь!» я сказаў «Жыве Беларусь!». Пры гэтым мае паплечнікі разгарнулі бел‑чырвона‑белы сцяг і расцяжку «За прафесійную армію». Двух затрымалі, адвялі ў аддзяленне міліцыі, але праз гадзіну адпусцілі», — расказаў Ф.Вячорка.
Таварышы, паводле слоў Франака, ставяцца да яго нармальна.
«Я адразу заявіў, што буду размаўляць толькі па‑беларуску, і гэта не выклікала ніякай негатыўнай рэакцыі.Больш за тое, я стаў своеасаблівым «адвакатам» у таварышаў. Напрыклад, у часці не было тэлефона‑аўтамата, а мабільныя тэлефоны забаронены. З гэтай скаргай я хадзіў да начальства. Былі таксама праблемы з абуткам — яго выдавалі рознага памеру. Са скаргай да кіраўніцтва зноў жа ішоў я, і гэтыя праблемы вырашаліся», — паведаміў Вячорка.
Паводле слоў маладзёжнага актывіста, адразу пасля дастаўкі ў ваенную часць з ім на працягу трох дзён запар гутарылі следчыя Мінскай міжгарнізоннай ваеннай пракуратуры. Яны разбіраліся са скаргай бацькоў Вячоркі наконт яго незаконнага прызыву ў армію. «У мяне склалася ўражанне, што яны вельмі сур’ёзна падыходзяць да справы і маюць намер разабрацца ў ёй да канца», — зазначыў Франак.
Як паведамлялася раней, 16 ліпеня 2008 года медкамісія ваенкамата Савецкага раёна Мінска прызнала Ф.Вячорку непрыгодным да ваеннай службы па стане здароўя. Абласная медкамісія паставіла гэтае рашэнне пад сумненне і накіравала маладога чалавека на абследаванне ў ваенны шпіталь. У выніку яму была дадзена адтэрміноўка ад службы да сакавіка 2009 года. Аднак 16 студзеня ваенкамат Савецкага раёна Мінска прызнаў Вячорку прыгодным да ваеннай службы, а суд гэтага ж раёна, дзе было абскарджана рашэнне ваенкамата, 23 студзеня пакінуў гэтае рашэнне ў сіле. Рашэнне суда было прынята ў адсутнасць Франака Вячоркі і яго адваката.
Каментары