Расія гатова пры неабходнасці дапамагчы Беларусі абараніць яе суверэнітэт у выпадку адпаведных пагроз з боку Захаду, аналагічных «каляровых» рэвалюцый і дзяржпераваротаў, заявіў пасол Расіі ў Мінску Міхаіл Бабіч у інтэрв'ю РІА Навіны.
«Усім, мне здаецца, даўно хацелася б зразумець, хто робіць замах на беларускі суверэнітэт і ад каго яго хочуць абараніць? Калі гэта пагроза з Захаду, па аналогіі з вядомымі «каляровымі» рэвалюцыямі і дзяржаўнымі пераваротамі, то Расійская Федэрацыя як саюзнік, калі паступіць такая просьба, будзе разам з Беларуссю адстойваць гэты суверэнітэт усімі даступнымі сродкамі», — сказаў Бабіч.
Ён дадаў, што «калі гэта намёкі на Расію, то гэта зусім не па-партнёрску». «І нават калі гэта ўсяго толькі выбарчая тэхналогія пад назвай «мабілізацыя электарату шляхам фарміравання вобразу ворага», наўрад ці разумна такую тэхналогію рэалізоўваць за кошт стасункаў з найбліжэйшымі саюзнікам і брацкім народам. Расія такога стаўлення не заслужыла», — падкрэсліў дыпламат.
Таксама ён адзначыў, што Масква не прапаноўвала Беларусі ўступіць у склад Расіі.
«Гэтага не проста ніхто нікому не прапаноўваў, а наадварот, прэзідэнт РФ неаднаразова — і публічна, і ў асабістых размовах з прэзідэнтам Беларусі, давёў сваю пазіцыю: Расія выступае выключна за двухбаковае ўзаемавыгаднае развіццё Саюзнай дзяржавы, калі гэтага хочуць нашы беларускія сябры», - сказаў Бабіч.
Ён дадаў, што калі ў Беларусі развіцця Саюзнай дзяржавы не хочуць, то можна «развіваць любы іншы інтэграцыйны фармат адносінаў».
Таксама пасол заклікаў беларускі бок вызначыцца з прыярытэтным фарматам развіцця інтэграцыі і заявіў, што трэба выконваць гэтыя дамоўленасці, а не абменьвацца папрокамі ў эканамічнай сферы.
Цяпер чытаюць
Той самы масажыст расказаў, навошта здымаў голых кліентак22
Каментары