Як стала вядома «Нашай Ніве», увечары 30 чэрвеня ў Старых Дарогах супрацоўнік міліцыі — папярэдне — інспекцыі па справах непаўналетніх мясцовага РУУС, на ўласным аўтамабілі збіў двух хлопцаў.
Мясцовыя жыхары кажуць, што здарэнне нібыта адбылося на пешаходным пераходзе, аднак, паводле ацэнак міліцыі, наезд адбыўся за межамі пешаходнага пераходу.
Адзін з пешаходаў у выніку здарэння трапіў у кому, у другога пераламаныя ногі і рукі — абодва яны ў бальніцы Слуцка.
Паводле папярэдняй інфармацыі, хлопцы, якія былі нападпітку, вярталіся дадому — той, што ў коме, жыве акурат праз дарогу.
Мы звязаліся з яго маці. Яна сцвярджае, што даведалася пра здарэнне толькі праз 14 гадзін.
«Мне афіцыйна дагэтуль нічога не паведамілі, пра аварыю ўвогуле расказалі абсалютна левыя людзі! Мы як даведаліся, паехалі ў міліцыю, а яны нам адразу пра тое, колькі кампанія гарэлкі выпіла! Ну і што? Так, гэта мой крыж, мой боль, сын часам злоўжываў, але ён жа не бяздомны — ён праз дарогу жыве! Чаму вы нам не сказалі? У міліцыі сказалі таксама, што кіроўца быў цвярозы, хуткасць «у межах нормы» — 30 км/г. Але хіба тады так перамалоціць людзей? Мой у вельмі цяжкім стане, а той, што збіў, знаходзіцца дома, як нам сказалі ў РУУС», — паведаміла маці пацярпелага.
Заведзеная крымінальная справа.
Цяпер чытаюць
Палякі купляюць дамы ў Беларусі — цікавяцца, ці хопіць на жыццё еўрапейскай пенсіі, і радуюцца смешным выдаткам9
Каментары