Макей заклікаў Еўрасаюз працягнуць дыялог і супрацоўніцтва з Мінскам

Міністр замежных спраў Беларусі Уладзімір Макей 19 чэрвеня прыняў удзел у восьмай штогадовай сустрэчы кіраўнікоў знешнепалітычных ведамстваў краін — сяброў Еўрапейскага саюза і краін — удзельніц ініцыятывы ЕС «Усходняе партнёрства» ў Люксембургу па запрашэнні высокага прадстаўніка ЕС па замежных справах і палітыцы бяспекі, віцэ-старшыні Еўрапейскай камісіі Федэрыкі Магерыні і еўрапейскага камісара па Еўрапейскай палітыцы суседства і перамовах аб пашырэнні ЕС Ёханеса Хана, паведамілі БЕЛТА ў прэс-службе МЗС.

«Выступаючы на пленарным пасяджэнні міністэрскай сустрэчы, Уладзімір Макей прывёў канкрэтныя факты, якія пацвярджаюць рэзультатыўнасць палітыкі ўзаемадзеяння паміж Беларуссю і Еўрасаюзам. Заклікаў Брусель і еўрапейскія сталіцы прадоўжыць лінію на дыялог і супрацоўніцтва з Мінскам у двухбаковым і шматбаковым фарматах. Са шкадаваннем канстатаваў факты вываду праблем у двухбаковых адносінах з некаторымі краінамі - сябрамі ЕС на шматбаковыя пляцоўкі. У гэтым кантэксце згадаў пытанне будаўніцтва Беларускай АЭС, факты адмовы ў далучэнні Беларусі да некаторых канвенцый Савета Еўропы. Адзначыў контрпрадуктыўнасць выкарыстання прынцыпу салідарнасці ў Еўрасаюзе для аказання націску на трэція краіны», -пе- расказалі ў прэс-службе.

Акрамя таго, міністр прыцягнуў увагу ўдзельнікаў мерапрыемства да ідэі Беларусі аб запуску новага глабальнага міратворчага працэсу ў мэтах узгаднення ўзаемапрымальных умоў суіснавання дзяржаў пры належным уліку інтарэсаў малых і сярэдніх краін. Уладзімір Макей падкрэсліў важнасць аднаўлення даверу паміж дзяржавамі, а не стварэння новых раздзяляльных ліній, таксама ён выказаўся на карысць развіцця ўзаемадзеяння паміж еўразійскай і еўрапейскай інтэграцыйнымі платформамі.

Кіраўнік знешнепалітычнага ведамства адзначыў мэтазгоднасць захавання і развіцця «Усходняга партнёрства» як ініцыятывы, нацэленай на атрыманне канкрэтных практычных вынікаў. У сувязі з гэтым ён выказаў шэраг прапаноў беларускага боку для іх уліку пры падрыхтоўцы да саміту «Усходняга партнёрства» ў Бруселі 24 лістапада 2017 года.

Кіраўнік МЗС Беларусі прыняў таксама ўдзел у асобнай сустрэчы кіраўнікоў дэлегацый краін - удзельніц «Усходняга партнёрства» з Федэрыкай Магерыні і Ёханесам Ханам. Асноўная ўвага на мерапрыемстве ўдзелена абмеркаванню ваенна-палітычнай сітуацыі ў рэгіёне, тэматыцы процідзеяння глабальным пагрозам, уключаючы тэрарызм, кіберзлачыннасць і кліматычныя змяненні.

Уладзімір Макей правёў таксама шэраг рабочых сустрэч з кіраўніцтвам еўрапейскіх структур і міністэрстваў замежных спраў краін — сяброў ЕС і краін — удзельніц «Усходняга партнёрства».

• 0
• 0
• 0
• 0
• 0
• 0
• 0
• 0